ހަތިޔާރުއެޅި ބޭރު ސިފައިން ރާއްޖޭގެ އެއްވެސް ސަރަހައްދެއްގައި ނުތިބޭނެ: ޑިފެންސް
ހަތިޔާރާ އެކު ޙަރަކާތްތެރިވާ ބޭރުގެ ސިފައިންގެ އެއްވެސް ބަޔަކު ދިވެހިރާއްޖޭގެ އެއްވެސް ތަނެއްގައި ހަރަކާތްތެރިނުވާކަމަށް ޑިފެންސް މިނިސްޓްރީން ވިދާޅުވެއްޖެއެވެ.
ޑިފެންސް މިނިސްޓްރީން މި ފަދައިން ވިދާޅުވީ އދ. މަހިބަދޫގައި އިއްޔެ ކުރިޔަށް ގެންދިޔަ "އިންޑިއާ އައުޓް" ޙަރަކާތުގައި އުތުރު ތިލަފަޅުގައި ތަރައްޤީކުރާ ކޯސްޓްގާޑް ބަނދަރާއި ޑޮކްޔާޑާ ގުޅޭ ގޮތުން ގިނަ ވާހަކަތަކެއް ދައްކައިފައި ވާތީ އެކަން ކުށްވެރިކޮށް ނެރުނު ބަޔާނުގައެވެ.
އެ ބަޔާނުގައި ވިދާޅުވެފައި ވަނީ އުތުރު ތިލަފަޅުގައި ތަރައްޤީކުރާ ކޯސްޓްގާޑް ބަނދަރާއި ޑޮކްޔާޑަކީ ދިވެހިރާއްޖޭގެ ޤައުމީ ދިފާޢީ ބާރުގެ ބޭނުންތަކަށް ޢަމާޒުކޮށް، ރާއްޖޭގެ ޤައުމީ ދިފާއީ ބާރުން ބޭނުންވާގޮތަށް ފަރުމާކޮށް، ދިވެހި ސިފައިންގެ ޤާބިލްކަން އިތުރުކުރުމަށް ތަރައްޤީކުރާ ދިވެހި ދައުލަތުގެ ސައްތައިން ސައްތަ މިލްކުވެރިކަން އޮތް އަދި، ދިވެހި ދައުލަތުގެ ފުރިހަމަ ބާރު ހިނގާ ބަނދަރެއް ކަމަށެވެ.
އެހެންކަމުން، އެ ތަނަކީ ބޭރު ޤައުމެއްގެ މިލިޓަރީ ބޭސްއެއް ނުވަތަ މަރުކަޒެއްކަމުގައި ސިފަކޮށް ދައްކައިފައިވާ ވާހަކަތަކަކީ ޙަޤީޤަތާ ޚިލާފް ދޮގު ވާހަކަތަކެއް ކަމަށާއި އެހެން ޤައުމުތަކުގެ އަސްކަރީ އުޅަނދުތައް ދިވެހިރާއްޖޭގެ ސަރަޙައްދަށް ވަނުމުގެ ކުރިން ހޯދަން ޖެހޭ ޑިޕްލޮމެޓިކް ކްލިއަރެންސް ނުވަތަ ހުއްދަ ދިނުމަކީ ދިވެހި ދައުލަތުގެ އަބަދުމެ ދެމިއޮންނާނެ ސިޔާދަތީ ޙައްޤެއް ކަމަށެވެ.
މިއާ އެކު ޤައުމެއްގެ އަސްކަރީ އުޅަނދުތައް ދިވެހިރާއްޖެއަށް އައުމުގައި ދިވެހި ދައުލަތުގެ ޑިޕްލޮމެޓިކް ކްލިއަރެންސް ނުވަތަ ހުއްދަ ނަގަން ނުޖެހޭނެ ކަމަށާއި އަދި މި ބަނދަރަށް ވަންނަން ދިވެހިރާއްޖޭގެ ޤައުމީ ދިފާއީ ބާރުގެ ހުއްދައެއް ހޯދަން ނުޖެހޭނެކަމަށް ދައްކައިފައިވާ ވާހަކަތަކަކީ ކަނޑައެޅިގެން ކަމުގެ ޙަޤީޤަތް އޮޅޭގޮތަށް ދައްކާފައިވާ ދޮގު ވާހަތަކެއްކަމަށް އެ ބަޔާނުގައި ފާހަގަކޮށްފައިވެއެވެ.
މީގެ އިތުރުން ހަތިޔާރާ އެކު ޙަރަކާތްތެރިވާ ބޭރުގެ ސިފައިންގެ އެއްވެސް ބަޔަކު ދިވެހިރާއްޖޭގެ އެއްވެސް ތަނެއްގައި ނެތް ކަމަށާއި އުތުރު ތިލަފަޅުގައި ތަރައްޤީކުރާ ދިވެހިރާއްޖޭގެ ޤައުމީ ދިފާޢީ ބާރުގެ ކޯސްޓްގާޑް ބަނދަރާއި ޑޮކްޔާޑުގައި ވެސް ހަތިޔާރާ އެކު ބޭރުގެ އެއްވެސް ބަޔަކު ޙަރަކާތްތެރި ނުވާ ކަމަށް މިނިސްޓްރީން ވިދާޅުވިއެވެ.
އަދި ދިވެހިރާއްޖޭގެ ޤައުމީ ސަލާމަތާއި، ދިވެހިރާއްޖޭގެ އަމާންކަމާއި ޞުލްޙަމަސަލަސްކަން ގެއްލުވައިލައި ދިވެހި
އަސްކަރިއްޔާގެ ނަޒާހަތްތެރިކަން ގެއްލުވައިލައި ސިފައިންގެ އަގުވައްޓައިލާން ޙަޤީޤަތާ ޚިލާފް ދޮގު މަޢުލޫމާތު ނުފެތުރުމަށް އިލްތިމާސްކުރާ ކަމަށް ވެސް އެ ބަޔާނުގައި ބުނެފައިވެއެވެ.
ކާކު ތިވާހަކަޔަށް އިތުބާރުކުރާނީ. ހުރިހާ އެއްބަސްވުމެއް އޮތީ ސިއްރުކޮށްފަ. ސިއްރުކަންތައްކުރަން އާދަވެފައިތިބޭ މީހުން ނުކުމެ ދައްކާ ވާހަކައަކަށް އިތުބާރެއް ނުކުރެވޭނެ. ހަތިޔާރު އެޅިޔަސް، ނޭޅިޔަސް ވަރިހަމަ. ބޭރުގެ އެއްވެސް ޤައުމެއްގެ ސިފައިން މިރާއްޖޭގައި ތިބޭކަށް ނުޖެހޭ. ތިބިއްޔާ އަވަހަށް ފޮނުވާލަންވީ.