މ.އަތޮޅުގެ އެމްޑީޕީގެ މެމްބަރުން އެދުނު ގޮތަށް، ޕާޓީ ހިންގައިލާން މަސަައްކަތް ކޮށްދޭނަން: ރޮޒައިނާ
މ.އަތޮޅުގެ އެމްޑީޕީގެ މެމްބަރުންގެ އެދުނު ގޮތަށް އެ ޕާޓީ ހިންގައިލާން މަސައްކަތް ކޮށްދެއްވާނެކަމަށް އެމްޑީޕީގެ އަންހެނުންގެ ރޫހުގެ ރައީސް ކަމަށް ވާދަކުރައްވާ، ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެެއްޖެއެވެ.
ރޮޒައިނާއާ އެކު، އެމްޑީޕީގެ ޗެއާޕާސަންގެ މަގާމަށް ވާދަކުރައްވާ އިކޮނޮމިކް މިނިސްޓަރު ފައްޔާޒު އިސްމާއީލް ވެސް އަތޮޅުތަކަށް ދަތުރު ކުރައްވަމުން ގެންދަވާއިރު، މ.އަތޮޅުން ދިން ލޯތްބާއި ތާއީދަށް ޓަކައި ރޮޒައިނާ ވަނީ އެ އަތޮޅުގެ އެމްޑީޕީ މެމްބަރުންނަށް ޝުކުރު ދަންނަވައި، ރައްޔިތުން އެދޭ ކަންތައް ކޮށްދެއްވާނެ ކަމަށް ވިދާޅުވެފައެވެ.
"ތި ބޭފުޅުން އެދިލެއްވި ގޮތަށް، އެމްޑީޕީ ހިންގާލަން އަޅުގަނޑުމެން މަސައްކަތް ކޮށްދޭނަން." އޭނާ ވިދާޅުވިއެވެ.
"އެމްޑީޕީ ހިންގާލަން" ކެމްޕެއިންގެ ދަށުން، ފައްޔާޒާއި ރޮޒައިނާގެ ޓީމުން މި ދަތުރުގައި މިއަދު އެންމެ ފުރަތަމަ މަންޒިލެއްގެ ގޮތުގައި ދަތުރު ކުރީ ދ.ހުޅުދެއްޔަށެވެ. އެރަށުން އެ ދެބޭފުޅުންނަށް މަރުހަބާ ކިޔައިފައި ވަނީ ދަނޑި ޖެހުމުގެ ހަރަކާތްތަކާ އެކުގައެވެ.
އަންނަ މެއިމަހުގެ 14ވަނަ ދުވަހު ބާއްވާ އެމްޑީޕީ އެތެރޭގެ އިންތިހާބުގެ ކެމްޕެއިން ކުރިއަށް ދަނީ ވަރަށް ފޯރީގައެވެ. މި އިންތިޚާބުގައި އަންހެނުންގެ ރޫހުގެ ރައީސްކަމަށް، ރޮޒައިނާއާ ވާދަކުރައްވަނީ ސަފާތު އަހުމަދު ޒާހިރެވެ. ޗެއާޕާސަންގެ މަގާމަށް ވާދަ ކުރައްވަނީ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި)އާއި އިކޮނޮމިކް މިނިސްޓަރ ފައްޔާޒް އިސްމާޢީލެވެ.
