ގޯތި ލިބޭނީ 600 އަކަފޫޓުގެ ބިމެއް ނެތް މާލޭ ރަށްވެހިންނަށް: އަސްލަމް

މާލޭ ރައްޔިތުންނަށް ދޫކުރަން ނިންމައިފައިވާ ގޯތި ލިބޭނީ އެ މީހެއްގެ މިލްކިއްޔާތުގައި މާލޭގައި 600 އަކަފޫޓުގެ ނުވަތަ އެއަށް ވުރެ ބޮޑު ބިމެއް ނެތް މީހުންނަށް ކަމަށް ނެޝަނަލް ޕްލޭނިން، ހައުސިން އެންޑް އިފްރާސްޓްރަކްޗާ މިނިސްޓަރު މުހައްމަދު އަސްލަމް މިއަދު ވިދާޅުވެއްޖެއެވެ.

Ads by MWSC

އަސްލަމް މިފަދައިން ވިދާޅުވީ މާލެ ރައްވެހިންނަށް ގޯތި ދޫކުރުމުގެ އުސޫލާ ބެހޭ ގޮތުން ރައްޔިތުންގެ މަޖިލީހުގައި ގަލޮޅު ދެކުނު ދާއިރާގެ މެމްބަރު މީކާއިލް ނަސީމް މިއަދުގެ ޖަލްސާގައި ސުވާލުކުރެއްވުމާ ގުޅިގެންނެވެ.

އެ ސުވާލަށް ޖަވާބު ދެއްވަމުން މިނިސްޓަރ ވިދާޅުވީ މާލޭ މީހުންނަށް ގޯތި ދޫކުރުމުގައި ބަލާނެ ހަތަރު ކަމެއް މިހައިތަނަށް ނިންމައިފައިވާ ކަމަށެވެ.

އަސްލަމް ވިދާޅުވީ މާލޭގައި ދިރިއުޅޭނެ އެއްވެސް ތަނެއް ނެތް މާލެ މީހުންނަށާއި ދަފްތަރަށް އުފަން މީހުންނަށް ވެސް ގޯތިތަކަށް ކުރިމަތިލެވޭނެ ކަމަށެވެ. މީގެ އިތުރުން މާލޭ ރައްޔިތުންނަށް ގޯތި ދޭނީ 600 އަކަފޫޓުގެ ބިމެއް އެމީހެއްގެ މިލްކިޔާތުގެ ނެތް މީހުންނަށް ކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ ގޯތި ލިބުމަށް ޝަރުތެއްގެ ގޮތުގައި އޮންނަނީ ހަމައެކަނި 600 އަކަފޫޓުގެ ބޮޑުމިން ހަމަނުވާ ގޯއްޗެއް އޮތުން ކަމަށާއި ދެން އޮންނާނީ މާކުސް ދޭނެ މިންގަނޑެއް ކަމަށެވެ. އެ ގޮތުން އެކި އުމުރުތަަކަށް މާކުސްދޭ ގޮތް ތަފާތުވާނެ ކަމަށާއި “އުމުރުފުރާތަކަށް މާކްސް ދިނުމުގައި މީހަކާ އިނދެގެން އުޅޭތީއޭ ކިޔައިފައި އިތުރު މާކްސްއެއް ދިނުމުގެ ވިސްނުމެއް އަޅުގަނޑުމެންގެ ނެތް” ކަމަށް އަސްލަމް ވިދާޅުވިއެވެ.

މީގެ އިތުރުން ދަފްތަރުގެ ތެރޭގައި ތިބި މީހުންގެ ތެރެއިން ދަފްތަރަށް އުފަން މީހުން ނުވަތަ ދަފުތަރުގައި ޖެހިފައިވާ ފަރާތްތަކަށް ލިބޭ ކުދިންގެ ތެރެއިން މާލެއަށް އުފަން ކުދިންނާ މެދު ކަންކުރާނެ ގޮތަކާ މެދު މަޝްވަރާކުރަމުން އަންނަ ކަމަށް މިނިސްޓަރު ވިދާޅުވިއެވެ.

މާލޭގެ ރަށްވެހިންނަށް ގޯތި ދިނުމަށް ނިންމައިފައިވާ ނިންމުމަށް އަމަލީ ސިފަ ގެނައުމުގެ ގޮތުން، ހުޅުމާލެއާއި، ގުޅީ ފަޅުންނާއި، ގިރާވަރު ފަޅުން ގޯތި ދޫކުރުމަށް ނިންމައިފައިވާކަން ރައީސް އިބުރާހިމް މުހައްމަދު ސާލިޙް މީގެ ކުރިން ވަނީ ހާމަކުރައްވައިފައެވެ.

މާލޭގެ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލަ ހައްލު ކުރުމުގެ ގޮތުން، ހުޅުމާލެއިން މަދުވެގެން 1،000 ގޯއްޗާއި، ގުޅިފަޅުން މަދުވެގެން 2،000 ގޯތި ދޭން ރައީސް ވަނީ ނިންމައިފައެވެ.

މީގެ އިތުރުން ގިރާވަރު ފަޅު ހިއްކައި އެ ބިމުން ވެސް މަދުވެގެން 2،000 ގޯތި މާލޭގެ ރަށްވެހިންނަށް ދޫކުރައްވާނެކަމަށް ވެސް ރައިސް ސާލިހު ވިދާޅުވެފައިވެއެވެ.