މައުސޫމް ޒިޒްގެ ދުލުން ބަހެއް ބުނެވޭގޮތް ވޭތޯ މަންމަ ވަމުންދާ ޤުރުބާނީގައި އެދެނީ އެހީތެރިކަމަށް!
ދަރިންނަކީ ދުނިޔެއާއި އާޚިރަތުގެ ފައިދާއަށް ޓަކައި މާތް ﷲ ދެއްވާ ބޮޑު ނިޢުމަތެކެވެ. އެއީ މައިންބަފައިންގެ ލޮލުގެ ފިނިކަމެވެ. ހިތުގެ ހަމަޖެހުމެވެ. ދަރިއަކު އުފަންވާ ހިސާބުން ފެށިގެން އުފަލާއި، ހިތްހަމަޖެހުމާއި، ހިތް ނުތަނަވަސްކަމާއި، ކަންބޮޑުވުމާއި، މި ނޫން ވެސް އެތައް ކަމަކާ ކުރިމަތިލާން ޖެހެއެވެ. މި ދުނިޔެއަކީ އުނި ތަނެއްކަން ދަނެ، ދުނިޔޭގައި ދިމާވާ އެންމެހައި އިމްތިހާންތަކަށް ކެތްކުރުމަކީ ވަރަށް މުހިންމު ކަމެކެވެ.
މިއީ އުމުރުން އެންމެ 5 އަހަރުގެ މުގައްޒިޒްގެ (ޒިޒް) ވާހަކައެވެ. ވަރަށް ބަސްއަހާ އަދި އެހާމެ މަޖާ މިޒާޖެއްގެ ކުއްޖެކެވެ. ޒިޒްގެ މަންމަ ޒިޒް ސިފަކުރީ އެންމެންގެ މޫނު މައްޗަށް އުފާވެރިކަން ގެނުވައިދޭ އެންމެންނާ ވެސް ވަރަށް ގުޅޭ ހަރަކާތްތެރި ކުއްޖެއްގެ ގޮތުގައެވެ. އެހެން ނަމަވެސް ޒިޒްއަށް މިވަގުތު މި ވަނީ އަޅުގަނޑުމެންގެ ހެޔޮ ދުޢާއާއި ދީލަތި އެހީއަށް ބޭނުންވެފައެވެ.
ޒިޒްގެ މަންމަ ޝިފާނާ އަބްދުއްރަޙީމް “ދެން”އަށް މަޢުލޫމާތު ދެއްވަމުން ބުނީ ޒިޒްއަކީ ވަރަށް ޅައިރުން ފެށިގެން ވެސް ޞިއްޙީ މައްސަލަތަކެއް ދިމާވެފައިވާ ކުއްޖެއް ކަމަށެވެ. އެގޮތުން، އެންމެ ބޮޑަށް ދިމާވި އެންމެ ބޮޑު މައްސަލައަކީ ވާހަކަ ދެއްކުމުގެ ދަތިތަކާ ހުރެ، އެއްވެސް ވަރަކަށް ވާހަކަ ނުދެއްކިދިޔުން ކަމަށެވެ.
ޝިފާނާ ބުނީ ދަރިފުޅަށް 18 މަަހުގައި އެއްވެސް ވަރަކަށް ވާހަކަ ނުދައްކާތީ އެކަން ސަމާލުކަމަށް އައި ކަމަށެވެ. އަދި އުމުރުން ގާތްގަޑަކަށް ދޮޅު އަހަރުގައި މަންމަ ބައްޕަ ފިޔަވައި އިތުރު އެއްވެސް ބަހެއް ޒިޒް ނުކިޔާ ކަމަށެވެ. ނަމަވެސް ކުޅުދުއްފުށީ ރީޖަނަލް ހޮސްޕިޓަލަށް ސްޕީޗް ތެރަޕިސްޓެއް ހަމަޖެހުމާ އެކު ބަރާބަރަށް ސްޕީޗް ތެރަޕީ ވެސް ނެގިކަމަށް ޝިފާނާ ބުންޏެވެ. ގާތްގަޑަކަށް 6 މަސްދުވަސް ވަންދެން ސްޕީޗް ތެރަޕީ ނަގައިފައިވާ ކަމަށާއި ކޮންމެ ވެސް ވަރެއްގެ ކުރިއެރުމެއް ލިބިފައިވާ ކަމަށް ޝިފާނާ ބުންޏެވެ.
“18 ވަރަކަށް މަހުގައި ބޭބީ އެއްވެސް ވަރަކަށް ވާހަކަ ނުދައްކާތީ އެކަން ސަމާލު ކަމަށް އައި. ދޮޅު އަހަރުގައި ވެސް ހަމަ އެކަނި ޒިޒްއަށް ކިޔުނު ބަހަކީ މަންމަ، ބައްޕަ އެކަނި. އޭގެ ފަހުން 6 މަސް ވަންދެން ސްޕީޗް ތެރަޕީ ވެސް ނެގިން. އޭގެން ކޮންމެ ވެސް ވަރެއްގެ ކުރިއެރުމެއް ލިބުނު” ޝިފާނާ ބުންޏެވެ.
އޭގެ ފަހުން ހދ. ކުޅުދުއްފުއްޓަށް ޑރ. ނާޒްކުރި ދަތުރެއްގައި ދަރިފުޅު ދެއްކި ކަމަށާއި ޑރ. ބެލިބެލުމުން ޒިޒްއަކީ އޯޓިސްޓިކް ކުއްޖެއްކަން އެނގުނުކަމަށް ޝިފާނާ ބުންޏެވެ. އަދި ކުއްޖާއަށް ދޭން ޖެހޭ ތެރަޕީތައް ކިޔައިދިން ކަމަށާއި އެ ތެރަޕީތައް ދީގެން ކޮންމެވެސް ވަރަކަށް ފަރުވާ ލިބޭނެކަމަށް ޑރ. ބުނެފައިވާ ކަމަށް ނާޒް ބުންޏެވެ. އެ ތެރަޕީތަކުގެ ތެރޭގައި އޮކިއުޕޭޝަނަލް ތެރެޕީ،ސެންސަރީ އިންޓެގްރޭޝަން ތެރެޕީ، ބިހޭވިއަރ ތެރެޕީ، އަރޓް ތެރެޕީ، ސްޕީޗް ތެރެޕީ، އޭޑީއެޗްޑީ ޕްރޮގްރާމް، އާރލީ އިންޓަރވޭޝަން ޕްރޮގްރާމް، ޕޮޒިޓިވް ބިހޭވިއަރ ޕްރޮގްރާމް އަދި ސޯސިއަލައިޒޭޝަން ސްކިލްސް ޓްރެއިނިން ހިމެނެއެވެ. ޝިފާނާ ބުނީ އެ ތެރަޕީތަކަކީ މާލެއިން ނެގެން ހުރި ތެރެޕީތަކެއް ކަމަށާއި ފަރުވާ ހޯދުމަށް މާލެ ގޮސް މާލޭގައި ގިނަ ދުވަސްތަކެއް ވަންދެން ތިބެން ޖެހޭތީ އެ ފަދަ ތަނަވަސްކަމެއް އާއިލާގެ ކިބައިގެ މިވަގުތު ނެތް ކަމަށެވެ.
އޭގެ ފަހުން އިންޑިޔާގެ މުމްބާއިގައި ހުންނަ ހޮސްޕިޓަލުގެ ޑޮކްޓަރަކަށް އޮންލައިންކޮށް ދެއްކުމުން ސްޓެމްސެލް ތެރެޕީ ދެވިއްޖެ ނަމަ، ދަރިފުޅު ރަނގަޅުވާނެކަމުގެ ޔަޤީންކަން ޑޮކްޓަރ ދީފައިވާކަމަށް ޝިފާނާ ބުންޏެވެ. ސްޓެމް ސެލް ތެރަޕީއަކީ އިންފްލެމޭޝަން ދަށްކޮށް، އިމިއުން ސިސްޓަމް މޮޑިއުލޭޓްކޮށް ހަށިގަނޑުގެ ތެރޭގައި ހަލާކުވެފައިވާ ސެލްތައް އަލުން އިއާދަ ކުރުމަށް ތައްޔާރުކޮށްފައިވާ ރީޖެނެރޭޓިވް މެޑިސިންގެ ވައްތަރެކެވެ. އަދި މިއީ ކުއްޖާގެ މައިބަދައިން ސްޓެމްސެލް ނަގައިގެން ސިކުނޑީގެ ނާރުތަކަށް އިންޖެކްޓްކޮށްގެން ދޭ ފަރުވާއެކެވެ. ޝިފާނާ ބުނީ މި ޓްރީޓްމެންޓް ނެގިއްޖެ ނަމަ ދަރިފުޅަކީ އެހެން ކުދިންނެކޭ ވެސް އެއްފަދައިން ވާހަކަ ދެއްކޭ “ނޯމަލް” ކުއްޖަކަށް ވާނެ ކަމަށް ޑޮކްޓަރު ބުނެފައިވާ ކަމަށެވެ.
“ޒިޒްގެ ޓްރީޓްމެންޓްގެ 90% ޔަގީންކަން ޑޮކްޓަރ އެބަދޭ ނޯމަލް ކިޑަކަށް ވާނެ ކަމުގެ. އެހެންވެ އެ ޗާންސް ޓްރައި ކޮށްލަން ބޭނުން. އެންމެ ރަނގަޅީ 3 އަހަރާ 5 އަހަރާ ދެމެދު ސްޓެމް ސެލް ނެގުން. ޑޮކްޓަރ ބުނީ އެންމެ ރަނގަޅު ރިޒަލްޓް ލިބޭނީ އޭރުން ކަމަށް. މިހާރު ޒިޒްއަށް 6 އަަހަރު ފުރެން އުޅެނީ. އެހެންވެ އަވަހަށް ޓްރީޓްމެންޓް ނަގަން ޑޮކްޓަރ ބުނީ. 5 -11 އަހަރުގެ ކުދިންނަށް ވެސް ރިޒަލްޓް ރަނގަޅު ވާނެ ކަމަށް, އަވަހަށް ކުރީމަ ކަމަށް އެންމެ ބެސްޓް ރިޒަލްޓް އަންނާނީ ކުއްޖާއަށް” ޝިފާނާ ބުންޏެވެ.
އިންޑިއާގެ މުމްބާއީގައި ހުންނަ ނިއުރޯޖެން ބްރެއިން އެންޑް ސްޕެއިން އިންސްޓިޓިއުޝަންއިން ހަދާ މި ޓްރީޓްމެންޓަށް 14 ދުވަހުގެ މުއްދަތަށް ހޮސްޕިޓަލްގައި މަޑުކުރަން ޖެހެއެވެ. މި ޓްރީޓްމެންޓަށް ހަރަދުވާނެ ކަމަށް ހޮސްޕިޓަލުން ބުނެފައި ވަނީ 13,900 ޑޮލަރެވެ. އޭގެ ތެރޭގައި ހުރުމުގެ ޚަރަދު ވެސް ހިމެނެއެވެ. މީގެ އިތުރުން ދަރިފުޅާ އެކު މަދުވެގެން 2 އެހީތެރިން ދާން ޖެހޭތީ އެމީހުންގެ ދެކޮޅު ޓިކެޓާއި ހުރުމާއި ކެއުމުގެ ޚަރަދު ވެސް ކުރަން ޖެހޭތީ އެ އާއިލާއިން އެދެނީ ތިޔަ އެންމެހާ ފަރާތްތަކުގެ ދީލަތި އެހީތެރިކަމަކަށެވެ.
ޒިޒްއަށް އެހީތެރިވުމަށް ފައިސާ ޖަމާކުރައްވަން ބޭނުންފުޅުވާ ފަރާތްތަކުން ފައިސާ ޖަމާކުރާނީ:
ބީއެމްއެލް ރުފިޔާ އެކައުންޓު ނަންބަރ: 7770000053635 (ޝިފާނާ ޢަބްދުއްރަޙީމް)
ބީއެމްއެލް ޑޮލަރު އެކައުންޓް ނަންބަރ: 7770000071342 (ޝިފާނާ ޢަބްދުއްރަޙީމް)
އިތުރު މައުލޫމާތު ހޯދުމަށް: 9133331 ޝިފާނާ ޢަބްދުއްރަޙީމް (ޒިޒްގެ މަންމަ) , 9681522 މުޖްތަބާ އަޙްމަދު (ޒިޒްގެ ބައްޕަ)
މާތް ﷲ ޒިޒްއަށް އަވަސް ޝިފާއެއް މިންވަރު ކޮށްދެއްވައި، އަވަސް މުސްތަޤުބަލެއްގައި މި ޙާލަތުން ސަލާމަތް ކުރައްވާށިއެވެ. އާމީން!
މާތް ނަބިއްޔާ މުޙައްމަދު ޞައްލަ ﷲ ޢަލައިހި ވަސައްލަމްގެ ޙަދީޘް ކުރެއްވި ބަސްފުޅެއްގެ މާނައިގައި ވެއެވެ.
"އަދި އެމީހެއްގެ އަޚާގެ ކިބައިން ދުނިޔެ މަތީގައި ދަތިކަމެއް ފިލުވައިދީފި މީހަކަށް، އެ މީހަކަށް ޤިޔާމަތް ދުވަހު ޖެހޭ މުޞީބާތް ތަކުގެ ތެރެއިން މުޞީބާތެއް ﷲ ފިލުއްވައި ދެއްވާހުއްޓެވެ. އަދި އުނދަގުލެއް ޖެހިފައިވާ މީހާއަށް ފަސޭހަ ކޮށްދީފި މީހަކަށް، ﷲ އެމީހަކަށް ދުނިޔެމަތީގައްޔާއި އާޚިރަތުގައި ފަސޭހަ ކޮށްދެއްވާނެއެވެ.އަދި ހަމަކަށަވަރުން އެމީހެއްގެ އަޚާއަށް އެހީވުމުގެ މަތީގައި ހުންނަ މީހާއަށް އެހީތެރިވެވޮޑިގަތުން މަތީގައި ﷲ ވޮޑިގެންވެއެވެ."
މާތް ﷲއަށް ޓަކައި ކުރާ އެއްވެސް ހޭދައަކީ ގެއްލިގެންދާނެ އެއްޗެއް ނޫނެވެ. ދެ ދުނިޔޭގައި ވެސް މަތިވެރި ވެގެންވާ ސަވާބާއި ދަރުމައާއި ލުއިފަސޭހަކަން ލިބިގެންދާތަން ދެކޭނެއެވެ.
