ރައީސް ޔާމީން ކުރެންދުއަށް ވަޑައިގެންފި
ރައީސް އަބްދުﷲ ޔާމީން އަބްދުލްގައްޔޫމް، ޅ.ކުރެންދޫއަށް ވަޑައިގެންފިއެވެ.
އެ މަނިކުފާނު މިއަދު އެ ރަށަށް ވަޑައިގެންނެވުމުން، ރަށުގެ ބަނދަރު ސަރަހައްދުން ގިނަ އަދަދެއްގެ ބަޔަކު ވަނީ އެ މަނިކުފާނަށް މަރުހަބާ ދަންނަވައިފައެވެ.
އެ މަނިކުފާނު ކުރެންދުއަށް ވަޑައިގަންނަވައިފައި މި ވަނީ އެރަށު ކައުންސިލަށް ރައީސަކު ހޮވުމަށް ބާއްވާ އިންތިޚާބާ ގުޅިގެންނެވެ. މި އިންތިޚާބު އޮންނާނީ މިމަހުގެ 26 ވަނަ ދުވަހުއެވެ.
މި ބައި-އިލެކްޝަނަށް ވެރިކަން ކުރާ މައި ޕާޓީ، އެމްޑީޕީން ވާދަކުރަނީ ޅ. ކުރެންދޫ، ރީހުއްސަބާ، އަލީ ނަސީމެވެ. އެމްޑީޕީން ކެނޑިޑޭޓް ނެރެފައި ވަނީ އެތެރޭގެ އިންތިޚާބަކުންނެވެ. އެ އިންތިޚާބަށް ހުޅުވައިލުމުން ކުރިމަތިލީ ވެސް ނަސީމް އެކަންޏެވެ.
މީގެ އިތުރަށް ޕީޕީއެމުން މި ދާއިރާއަށް ވާދަކުރަނީ ކުރިން ވެސް ކުރެންދޫ ކައުންސިލްގެ ރައީސްކަން ކުރެއްވި އިސްމާއީލް މަދީހެވެ.
އެޕާޓީން ވެސް މަދީހު ހޮވައިފައި ވަނީ ޕްރައިމަރީއަކަށް ހުޅުވައިލައިގެންނެވެ. އެ އިންތިހާބަށް ކުރިމަތިލީ މަދީހު އެކަންޏެވެ.
ރައީސް ޔާމީން ކުރެންދޫއަށް ވަޑައިގެންނެވުމަށް ފަހުގައި، އެ އަތޮޅު ނައިފަރުގައި ބާއްވާ "އިންޑިއާ އައުޓް" ހަރަކާތުގައި ބައިވެރިވެވަޑައިގަތުމަށް ވެސް ވަނީ ހަމަޖެހިފައެވެ.
