ކާރު އެކްސިޑެންޓެއްގައި އިންޑިއާގެ އެކްޓްރެސްއެއް މަރުވެއްޖެ
ކާރު އެކްސިޑެންޓެއްގައި އިންޑިއާގެ ޓެލޫގޫ އެކްޓްރެސްއެއް މަރުވެއްޖެއެވެ.
"ޑޮލީ ޑީ ކްރޫޒް" ގެ ނަމުން މަޝްހޫރުވެފައިވާ ގަޔަތުރީ ކާރު އެކްސިޑެންޓެއްގައި މަރުވި އިރު އޭނާގެ އުމުރުން 26 އަހަރެވެ.
ފިލްމު އިންޑަސްޓްރީގައި ގަޔަތުރީ އެންމެ މަޝްހޫރުކަން ހޯދައިފައި ވަނީ ޓެލޫގޫ ވެބް ސީރީޒެއް ކަމަށްވާ "މެޑަމް ސަރ މެޑަމް އާންތޭ" އިންނެވެ. އޭގެ ފަހުން އޭނާ ވަނީ އޭނާގެ އަމިއްލަ ޔޫޓިއުބް ޗެނަލާއި އިންސްޓަގްރާމްގައި ވެސް ފައިތިލަ ސާބިތުކޮށް މަޝްހޫރުކަން ދަމަހައްޓައިފައެވެ.
ގަޔަތުރީގެ ކާރު އެކްސިޑެންޓުވެފައި ވަނީ ހައިދަރްއާބާދުގެ ގާޗީބޮލީ ސަރަހައްދުގައި ކަމަށް ރިޕޯޓުތަކުން ބުނެއެވެ.
ރިޕޯޓުތަކުން ބުނާ ގޮތުގައި، މި އެކްސިޑެންޓުވީ ހޯލީ ކުޅުމަށް ފަހު ގަޔަތުރީ އަނބުރާ ގެއަށް ދިޔަ މަގުމަތީގައި، ކާރު ދުއްވަން އިން އޭނާގެ އެކުވެރިއެއް ކަމަށްވާ ރާތޯޅަށް ކާރު ކޮންޓްރޯލު ނުކުރެވިގެންނެވެ. މި އެކްސިޑެންޓުގައި ރާތޯޅް ވެސް މަރުވި ކަމަށް ރިޕޯޓުތަކުން ބުނެއެވެ.
ގަޔަތުރީ މަރުވީ މި މަހުގެ 18 ވަނަ ދުވަހުގައެވެ.
ރިޕޯޓުތަކުން ބުނާ ގޮތުގައި އެކްސިޑެންޓު ވެގެން ގަޔަތުރީ ހޮސްޕިޓަލަށް ގެންދިޔަ އިރު ވެސް އޮތީ މަރުވެފައެވެ. ރާތޯޅް މަރުވީ ހޮސްޕިޓަލަށް ގެންގޮސް، ލިބުނު އަނިޔާތަކަށް ފަރުވާ ދެމުން ދަނިކޮށެވެ.
އޭނާގެ ހަނދާނުގައި އެތައް ބަޔަކު އޭނާ ދިރިއުޅޭ ގެއަށް މާބޮނޑި ފޮނުވައި، އިންސްޓަގްރާމުގައި ވެސް ތައުޒިޔާގެ މެސެޖުތައް ލިޔަމުންދެއެވެ.
