ސޯނަމް އިނީ އަލަތު ދަރިފުޅަށް ބަލިވެ
ބޮލީވުޑްގެ ބަތަލާ ސޯނަމް ކަޕޫރު، އޭނާގެ އަލަތު ދަރިފުޅަށް ބަލިވެއިންކަން ހާމަކޮށްފިއެވެ.
ވިޔަފާރިވެރިޔާ އާނަންދު އަހޫޖާއާ ކައިވެނިކޮށްގެން އުޅޭ ސޯނަމް ވަނީ އޭނާގެ މެޓާނިޓީ ފޮޓޯޝޫޓްގައި ނެގި ބައެއް ފޮޓޯތައް، މީގެ ކުޑައިރުކޮޅެއް ކުރިން މީސްމީޑިއާގައި ހިއްސާ ކޮށްފައެެވެ.
އިންސްޓެގްރާމާއި ފޭސްބުކަށް ދޫކޮށްލި ފޮޓޯތަކުގައި ފެންނަނީ ސޯނަމް އޭނާގެ ފިރިމީހާގެ އުނގުގައި އޮށޯވެލައިގެން އޮތްއިރު، ފިރިމީހާ އޭނާގެ ބަނޑުގައި ހިފަހައްޓައިލައިގެން ހުންނަ މަންޒަރެެވެ.
ފޮޓޯތަކުގެ ކެޕްޝަނުގައި އޭނާ ވަނީ އަލަތު ދަރިފުޅަށް މަރުހަބާ ކިޔަން ކެތްމަދުވެފައިވާ ކަމަށް ބުނެފައެެވެ.
ސޯނަމް ބަލިވެއިންކަން ހާމަކުރި އިރު، މީގެ ކުރިން، މިދިޔަ އަހަރުގެ ޖުލައިމަހުގެ ތެރޭގައި ވެސް މިފަދަ އަޑުތަކެއް އަރައިފައިވެއެވެ. އޭނާ ބަލިވެއިންކަމަށް ޚަބަރު ފެތުރިގެން ދިޔައީ ރަތް ކުލައިގެ މެކްސީ ހެދުމެއް ލައިގެން ހުރިއިރު، ބަނޑުބޮޑު ކަމަށް ދެއްކުމުންނެވެ. އޭރު ސޯނަމް ވަނީ އެވާހަކަތައް ދޮގު ކޮށްފައެވެެ.
ސޯނަމް ބަނޑުބޮޑުކަން އެނގުމާއެކު ޚުޝީ ކަޕޫރާއި ކަރީނާ ކަޕޫރު ފަދަ ތަރިން އަންނަނީ އޭނާއަށް މަރުހަބާ ކިޔަމުންނެވެ.
ސޯނަމްއާއި އަހޫޖާ ކައިވެނި ކުރީ 2018ވަނަ އަަހަރުގައެވެ. ކައިވެންޏަށް ފަހު، ދެމީހުން ދިރިއުޅެމުން އަންނަނީ ލަންޑަންގެ ނޮޓިން ހިލްގައެވެ.
