މިދިޔަ 16 އަހަރު ނުވިކަމެއް ދެންވާނެކަމަށް ގަބޫލު ނުކުރެވޭ: ފައްޔާޒު
އެމްޑީޕީގެ އާންމު މެމްބަރުންނާއި ޕާޓީއާ ގުޅުވައި ދިނުމަށް ޓަކައި ފާއިތުވެދިޔަ 16 އަހަރު ލިބުނު ފުރުސަތުގެ ބޭނުން ނުކުރެވުނު ބަޔަކަށް ދެން އެކަން ވެދާނެކަމާ މެދު ސުވާލު އުފެދޭ ކަމަށް އެމްޑީޕީގެ ޗެއާޕާސަންގެ މަޤާމަށް ވާދަކުރައްވާ އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވެއްޖެއެވެ.
ފައްޔާޒު މިފަދައިން ވިދާޅުވި މި އިންތިހާބުގެ ކެމްޕެއިނަށް ނ. ކެނދިކުޅުދުއަށް ވަޑައިގެން ބޭއްވި ޖަލްސާގައި ދެއްކެވި ވާހަކަފުޅުގައެވެ.
ފައްޔާޒު ވިދާޅުވީ ކެމްޕެއިން ދަތުރުތަކުގައި މިހާރު 60އަށް ވުރެ ގިނަ ރަށްރަށަށް ދެވިއްޖެ ކަމަށާއި އެއްވެސް ރަށެއްގެ ޕާޓީ ޖަގަހަ ނުހިންގާ ކަމަށެވެ. އަދި ޕާޓީގެ އާންމު މެމްބަރުންނާއި ޕާޓީއާ ގުޅުމެއް ނެތް ކަމަށާއި ޗެއަރޕާސަންގެ މަގާމަށް ފައްޔާޒު ހޮވިއްޖެ ނަމަ އެކަންތައްތައް ބަދަލު ކުރާނެ ކަމަށް ވިދާޅުވިއެވެ.
“ޕާޓީގެ އާންމު މެމްބަރުންނާއި، ޕާޓީއާ ގުޅުމެއް އޮތްކަމަކަށް ނުވޭ. އަޅުގަނޑު ތިޔަ ބޭފުޅުންނަށް މިހުށަހަޅަނީ އަޅުގަނޑު އެކަން ބަދަލު ކުރާނަމޭ. އަޅުގަނޑަށް ފުރުސަތު ދެއްވާށޭ” ފައްޔާޒު ވިދާޅުވިއެވެ.
މީގެ އިތުރުން، މިއަދު ޗެއާޕާސަންގެ މަޤާމަށް ފައްޔާޒާ އެކު ވާދަކުރައްވާ އިންތިއާއި އޭނާގެ ޓީމަކީ މިދިޔަ 16 އަހަރު އެމްޑީޕީގެ އާންމު މެމްބަރުންނަށް ޚިދުމަތް ކުރަން ލިބި އެކަން ނުކޮށްދެވުނު ބައެއްކަމަށް ފައްޔާޒު ވިދާޅުވިއެވެ.
”އަޅުގަނޑާއި ވާދަކުރައްވާ ބޭފުޅާއާއި އެބޭފުޅާގެ ޓީމަކީ މިދިޔަ 16 އަހަރު ވަންދެން އެކަން ހަވާލުކުރެވިފައި ތިބި ބޭފުޅުން. އެބޭފުޅުންނަށް އޭރު ނުވިކަމެއް މިހާރު ވާނެކަމަށް ގަބޫލުފުޅު ކުރުމަކީ އެއީ ތިބޭފުޅުންނަށް އޮތް ހައްގެއް” ފައްޔާޒު ވިދާޅުވިއެވެ.
އެމްޑީޕީގެ ޗެއާޕާސަންގެ އިންތިހާބުގެ ކެމްޕޭނު މިހާރު ވަނީ ވަރަށް ފޯރި ގަދަވެފައެވެ. މި އިންތިހާބުގެ ވޯޓްލުން އޮންނާނީ އަންނަ މޭ މަހުގެ 14 ވަނަ ދުވަހުއެވެ.
Ads by STO
