ބަނޑުބޮޑުކަން ހާމަކުރަން ސޯނަމް ލީ ހެދުން ގިނަ ބަޔަކަށް ކަމަކު ނުދިޔަ
އަލަތު ދަރިފުޅަށް ބަލިވެއިންކަން އިއުލާނު ކުރުމަށް ޓަކައި، ބަތަލާ ސޯނަމް ކަޕޫރު މީސްމީޑިއާގައި ހިއްސާ ކުރި ފޮޓޯތަކުގައި ނިވާކަން ކުޑަ ހެދުމެއް ލައިގެން އިނުމުން އޭނާއަށް ގިނަ ބަޔަކު ފާޑު ކިޔައިފިއެވެ.
ވިޔަފާރިވެރިޔާ އާނަންދު އަހޫޖާއާ ކައިވެނިކޮށްގެން އުޅޭ ސޯނަމް ވަނީ އޭނާގެ މެޓާނިޓީ ފޮޓޯޝޫޓްގައި ނެގި ބައެއް ފޮޓޯތައް އިއްޔެ ހެނދުނު މީސްމީޑިއާގައި ހިއްސާ ކޮށްފައެެވެ.
އިންސްޓެގްރާމާއި ފޭސްބުކަށް ދޫކޮށްލި ފޮޓޯތަކުގައި ފެންނަނީ ސޯނަމް އޭނާގެ ފިރިމީހާގެ އުނގުގައި އޮށޯވެލައިގެން އޮތް އިރު، ފިރިމީހާ އޭނާގެ ބަނޑުގައި ހިފަހައްޓައިލައިގެން ހުންނަ މަންޒަރެެވެ.
ފޮޓޯތަކުގެ ކެޕްޝަނުގައި އޭނާ ވަނީ އަލަތު ދަރިފުޅަށް މަރުހަބާ ކިޔަން ކެތްމަދުވެފައިވާ ކަމަށް ބުނެފައެެވެ.
ގިނަ މީހުންނަށް ކަމު ނުދިޔައީ ފޮޓޯތަކުގައި ސޯނަމް ލައިގެން ހުރި ކަޅު ކުލައިގެ ނިވާކަން ކުޑަ ހެދުމެވެ.
"ނިވާކަން ކުޑަ ހެދުމެއް ލައިގެން ނޫނީ ބަނޑުބޮޑުކަން ވެސް، މި ބޮލީވުޑްގެ ތަރިންނަށް ހާމަ ނުކުރެވެނީތަ؟" މީހަކު ކުރި ކޮމެންޓެއްގައިވެއެވެ.
"ހަށިގަނޑު ނިވާކޮށްފައި ވެސް، ދަރިއަކު ލިބެން އުޅޭ ވާހަކަ ބުނެވުނީސް." އިތުރު މީހަކު ލިޔެފައިވެއެވެ.
ސޯނަމް ބަނޑުބޮޑުކަން އެނގުމާއެކު އަނުޝްކާ ޝަރުމާއާއި، ޚުޝީ ކަޕޫރާއި ކަރީނާ ކަޕޫރު ފަދަ ތަރިން ވަނީ އޭނާއަށް މަރުހަބާ ކިޔައިފައެވެ.
ސޯނަމްއާއި އަހޫޖާ ކައިވެނި ކުރީ 2018ވަނަ އަހަރުގައެވެ. ކައިވެންޏަށް ފަހު، ދެމީހުން ދިރިއުޅެމުން އަންނަނީ ލަންޑަންގެ ނޮޓިން ހިލްގައެވެ.
