ޕާސްޕޯޓު ހިފަހައްޓައިފައި އޮތުމުން ރަސްމީ ދަތުރެއްގައި ސްމިތަށް ފުރޭ ގޮތެއް ނުވި
ޕާސްޕޯޓް ހިފަހައްޓައިފައި އޮތުމުން ޓޫރިޒަމް މިނިސްޓްރީގެ އެގްޒެކްޓިވް ޑިރެކްޓަރ އަލީ ހާޝިމް (ސްމިތު)އަށް ރަސްމީ ދަތުރެއްގައި ވަޑައިނުގެންނެވި ދަތުރު ކެންސަލް ކުރައްވަން ޖެހިވަޑައިގެންފިއެވެ.
މައުލޫމާތު ލިބިފައިވާ ގޮތުގައި ސްމިތު މިއަދު ފުރައިވަޑައިގަންނަވަން އުޅުންވީ ރަސްމީ ދަތުރެއްގައި ޓޫރިޒަމް މިނިސްޓަރ އަބްދުﷲ މައުސޫމްގެ އަރިހުގައެވެ. ޕާސްޕޯޓް ހިފަހައްޓައިފައިވާކަން އެނގިވަޑައިގަތީ އެއަރޕޯޓަށް ވަޑައިގަތުމުންނެވެ.
މައުލޫމާތު ލިބިފައިވާ ގޮތުގައި ސްމިތާއި މިނިސްޓަރ މައުސޫމް ވަޑައިގަންނަވަން އުޅުއްވީ ސާބިއާގައި އޮންނަ ޓޫރިޒަމް ފެއާއަކަށެވެ. ސްމިތަށް ފުރޭ ގޮތް ނުވިޔަސް، ޓޫރިޒަމް މިނިސްޓަރ ވަނީ ރޭ ފުރައިވަޑައިގެންފައެވެ.
އެ މިނިސްޓްރީގެ އޮފިޝަލަކު ވިދާޅުވީ، ސްމިތުގެ ޕާސްޕޯޓު ހިފަހައްޓައިފައިވާ ސަބަބެއް އޭނާއަށް ވެސް އެނގިވަޑައިނުގަންނަވާ ކަމަށެވެ. ނަމަވެސް ސްމިތުގެ ޕާސްޕޯޓު ހިފަހައްޓައިފައިވާ މައްސަލަ ކޯޓުތަކާ ގުޅިގެން ސާފުކުރަމުންދާ ކަމަށް ވެސް އޮފިޝަލު ވިދާޅުވިއެވެ.
ޓޫރިޒަމް މިނިސްޓްރީގެ އެގްޒެކެޓިވް ޑިރެކްޓަރުގެ މަގާމުގައި ހުންނެވި ސްމިތަކީ އެމްޑީޕީގެ ސިޔާސީ ހަރަކާތްތަކުގައި އެންމެ އިސް ސަފުގައި އާންމުކޮށް ހަރަކާތްތެރިވެ، ވަރަށް ގިނަ ފަހަރަށް ހައްޔަރު ވެސް ކޮށްފައިވާ ބޭފުޅެކެވެ.
