ނާޖިލާ މަރުވުމުގައި އިތުރު މީހެއްގެ ބައިވެރިވުމެއް ފެންނާކަށް ނެތް: ފުލުހުން
ކ. ގާފަރު ގެސްޓްހައުސްއެއްގެ ތެރޭގައި މަރުވެފައި އޮއްވައި ފެނުނު އއ. ބޮޑުފުޅަދޫ ފަރުދާބަގީޗާގޭ އައިމިނަތު ނާޖިލާގެ މަރުގެ މައްސަލައިގައި އިތުރު މީހެއްގެ ބައިވެރިވުމެއް ފެންނަން ނެތް ކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވީ އެ މަރާ ގުޅޭ ތަގުގީގު އަދި އެއްކޮށް ނުނިމޭ ކަމަށާއި މިހައިތަނަށް ބެލިބެލުމުން މި މައްސަލައިގައި އިތުރު އެއްވެސް މީހެއްގެ ބައިވެރިވުމެއް އޮތްކަން ފާހަގަކުރެވިފައި ނުވާ ކަމަށެވެ.
ނާޖިލާގެ ހަށިގަނޑު ފެނިފައި ވަނީ ގާފަރު ގެސްޓްހައުސްއެއްގެ ފާޚާނާ ތެރެއިންނެވެ. ނާޖިލާ ގާފަރަށް ގޮސްފައި ވަނީ އެކަނި ކަމަށާއި, ދަންވަރު އެކަނި ބޭރަށް ދިޔަ ކަމަށް އެ ރަށުގެ ބައެއް މީހުން ވަނީ މައުލޫމާތު ދީފައެވެ.
ނާޖިލާ މަރުވެފައި އޮއްވައި މިދިޔަ ހޯމަ ދުވަހުގެ ރޭ ފެނުނީ އޭނާގެ ޚަބަރެއް ނުވެގެން، ގެސްޓް ހައުސްގައި އޭނާ ހުރި ކޮޓަރި ބެލުމުންނެވެ.
