ތަފާތުކުރުމެއް ނެތި ރައީސް ޞާލިޙް ގެންދަވަނީ ހުރިހާ ކަމެއް ކޮށްދެއްވަމުން: ރޮޒައިނާ

އެއްވެސް ރައްޔިތެއް ތަފާތުކުރުމެއް ނެތި، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ގެންދަވަނީ ހުރިހާކަމެއް ކޮށްދެއްވަމުން ކަމަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.

Ads by Sosun Fihaara

ރޮޒައިނާ މިފަދައިން ވިދާޅުވީ އައްޑޫ ސިޓީ މީދޫގައި ތަރައްޤީކޮށްފައިވާ ބަނދަރު ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

ރޮޒައިނާ ވިދާޅުވީ މީދޫގެ ތާރީޚްގައި އެންމެ ގިނަ މަޝްރޫޢު ހިންގެވީ ރައީސް ޞާލިޙް ކަމަށެވެ. އަދި އާބާދީ ބޮޑުތޯ ކުޑަތޯ ބެއްލެވުމެއް ނެތި ރައީސް ޞާލިޙް ގެންދަވަނީ ހުރިހާކަމެއް ކޮށްދެއްވަމުން ކަމަށާއި އިންސާފަކީ އެއީ ކަމަށް ރޮޒައިނާ ވިދާޅުވިއެވެ.

"އެއްވެސް ރައްޔިތެއް ތަފާތުކުރުމެއް ނެތި އާބާދީ ބޮޑުތޯ ކުޑަތޯ ބެލުމެއް ނެތި ރައީސް އެ ގެންދަވަނީ ހުރިހާކަމެއް ކޮށްދެއްވަމުން. ހަޤީގަތަކީ އެއީ އިންސާފަކީ އެއީ ހަގީގަތަކީ" ރޮޒައިނާ އާދަމް ވިދާޅުވިއެވެ.

އައްޑޫ ސިޓީ މީދޫ ބަނދަރު ރަސްމީގޮތުން ހުޅުއްވައިދެއްވީ ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙްއެވެ. މި ބަނދަރު ހުޅުވައިދެއްވުމަށް ފަހު ރައީސް ޞާލިޙް ވަނީ ، ބަނދަރު ، އައްޑޫ ސިޓީ ކައުންސިލާ ހަވާލުކުރައްވައިފައެވެ.

މީދޫ ބަނދަރުގެ މަސައްކަތް ކުރިޔަށް ގެންގޮސްފައި ވަނީ މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ ޕލކ (އެމްޓީސީސީ)އިންނެވެ. މި މަޝްރޫޢުގެ ދަށުން ބަނދަރު ފުންކުރުމާއި ނެރު ފުންކުރުމާއި ސޭންޑް-ފިލް ބްރޭކްވޯޓަރ ހެދުމާއި 115 މީޓަރުގެ ބޭރުތޮށި ޖެހުމާއި 496 މީޓަރުގެ އެއްގަމު ތޮށި ޖެހުމާއި އެއްގަމު ތޮށްޓާއި އިންވެގެން ޕޭވްމަންޓް ހެދުމާއި ބަނދަރު ސަރަހައްދުގެ ލައިޓް ހަރުކުރުން ހިމެނެއެވެ.