ރާއްޖެއަށް ފްލޯޓިން ހޮސްޕިޓަލެއް ގެނައުމަށް ގޮވައިލައިފި
ދިވެހިރާއްޖެއަށް ފްލޯޓިން ހޮސްޕިޓަލެއް ގެނައުމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ގޮވައިލައްވައިފިއެވެ.
އޭނާ މިފަދައިން ގޮވައިލެއްވީ ރައްޔިތުންގެ މަޖިލީހުގެ މިއަދުގެ ޖަލްސާގައި، ގަމު ރީޖަނަލް ހޮސްޕިޓަލުގެ މައްސަލަތައް ހައްލު ކުރުމަށް ގޮވައިލައި، މާވަށު ދާއިރާގެ މެމްބަރު މުހައްމަދު ސައީދު މަޖިލީހަށް ހުށަޙެޅުއްވި މައްސަލައަށް ބަހުސް ކުރައްވަމުންނެވެ.
ޖާބިރު ވިދާޅުވީ ރާއްޖެއަށް ފްލޯޓިން ހޮސްޕިޓަލެއް ގެނައުމަށް ރައީސް އިބްރާހީމް މުޙައްމަދު ޞާލިޙުއަށް އޭނާ ގޮވައިލައްވާ ކަމަށެވެ.
ސިއްހީ ދާއިރާގެ މައްސަލަތައް ހައްލު ކުރުމަށް ޓަކައި ރަށްރަށުގެ ހޮސްޕިޓަލުތައް، އެ ރަށްރަށުގެ ކައުންސިލުތަކާ ހަވާލުކޮށް، ހޮސްޕިޓަލުތައް ޕްރައިވެޓައިޒް ކުރަން ޖެހޭކަން ފާހަގަކުރައްވައި އޭނާ ވިދާޅުވީ ކޮންމެ ގޭބިސީއަކަށް ހޮސްޕިޓަލެއް އެޅުމަކީ ކުރެވޭނެ ކަމެއް ނޫން ކަމަށެވެ.
"ހަމަ މިހާރުން މިހާރަށް އެމެރިކާގެ އެހީއަށް އެދޭށޭ. އިންޑިއާގެ އެހީއަށް އެދޭށޭ. ޔޫރަޕްގެ އެހީއަށް އެދޭށޭ. ލ.އަތޮޅަށް ވަގުތުން ވަގުތަށް މަނަވަރެއް ގެނެސް، ވަގުތުން ވަގުތަށް ލ.އަތޮޅު ރައްޔިތުން ސެޓިސްފައި(ހިތްހަމަޖެހޭ)ވަރު ކޮށްދޭށޭ." އޭނާ ވިދާޅުވިއެވެ.
ޖާބިރު ވަނީ މެމްބަރު ސައީދަށް ވެސް ވަަރަށް ބޮޑަށް ފާޑުވިދާޅުވެފައެވެ. އެގޮތުން ސައީދު އިކޮނޮމިކް މިނިސްޓަރަކަށް ހުންނެވި އިރު، ލ.އަތޮޅަށް ފްލޯޓިން ހޮސްޕިޓަލެއް ނުހޯއްދެވީ ކީއްވެގެންތޯ ސުވާލު ކުރެއްވިއެވެ.
