ފެނަކަ އޮފީހުގައި ބައްދަލުވުމެއް ބޭއްވީ މުވައްޒަފުން އެދިގެން: ރޮޒައިނާ
ފެނަކަ އޮފީހުގައި ބައްދަލުވުމެއް ބޭއްވީ އެ އޮފީހުގެ މުވައްޒަފުން އެދިގެން ފިނޭންސް މިނިސްޓަރާ ބައްދަލުކުރަން ކަމަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
ރޮޒައިނާ މިފަދައިން ވިދާޅުވީ އެމްޑީޕީގެ ޗެއާޕާސަން ކަމަށް ވާދަކުރައްވާ އިކޮނޮމިކް މިނިސްޓަރު ފައްޔާޒް އިސްމާއީލްގެ ކެމްޕެއިން ޓީމުން ގއ. ނިލަންދޫގެ ފެނަކަ އޮފީހުގައި ކެންޕޭން ބައްދަލުވުމެއް ބޭއްވި ކަމަށް ބުނެ އެ މައްސަލަ ބަލައިދޭން ޗެއާޕާސަން ކަމަށް ވާދަކުރައްވާ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީގެ ކެމްޕެއިން ޓީމުން ގޮވައިލުމާ ގުޅިގެންނެވެ.
މި މައްސަލަ ފެންމަތިވެފައި ވަނިކޮށް އިންތިގެ ކެމްޕެއިން ޓީމުގެ އިސް ދެ މެމްބަރަކު މަޑަވެލި ފެނަކަ އޮފީހުގައި ތިބި މަންޒަރު ދައްކުވައިދޭ ފޮޓޯއެއް މިއަދު މީސް މީޑިއާގައި ވަނީ އާންމުވެފަައެވެ.
ރޮޒައިނާ ކުރެއްވި ޓްވީޓެއްގައި ވަނީ ފެނަކަ އޮފީހުގެ މުވައްޒަފުން އެދިގެން ފިނޭންސް މިނިސްޓަރ އެމީހުންނާ ބައްދަލު ކުރުމުން ނޫސް ބަޔާން ނެރުނު މީހުން މަޑަވެލި ފެނަކަ އޮފީހުގައި ކުރައްވަނީ ކީއްތޯ ސުވާލުކުރައްވައިފައެވެ. އަދި ތިލަފަތުގެ ރަމްޒު ދޮގު ހެދުމާ އޮޅުވައިލުން ނޫން ކަމެއް ނުކުރާ ކަމަށާއި ކުރާ ކަމަކީ “ދެން ސަރުކާރާ އެކު މަސައްކަތް ކުރަން ރައްޔިތުން ހޮވީމަ ސަރުކާރު ބަދުނާމު ކުރުން” ކަމަށް ރޮޒައިނާ ވިދާޅުވިއެވެ.
އެމްޑީޕީގެ ޗެއާޕާސަން ކަމަށް ވާދަކުރައްވާ އިކޮނޮމިކް މިނިސްޓަރު ފައްޔާޒް އިސްމާއީލްއާއި މާފަންނު އުތުރު ދާއިރާގެ މެންބަރު އިމްތިޔާޒް ފަހުމީގެ ކެމްޕެއިން ވަނީ ވަރަށް ބޮޑަށް ވާދަވެރިވެފައެވެ. ދެ ކެނޑިޑޭޓުން ވެސް ދަނީ ރާއްޖޭގެ އެކި ކަންކޮޅުތަކުގައި ފޯރިއާ އެކު ކެމްޕެއިން ކުރައްވަމުންނެވެ.
