ބޯޑަރު ހުޅުވަން ސަރުކާރުން ހުރަސް އެޅި ގޮތް ހާމަކުރާނަން: ރައީސް ނަޝީދު

ކޮވިޑް-19އާ ގުޅިގެން ރާއްޖޭގެ ބޯޑަރުތައް ބަންދު ކުރުމަށް ފަހު އަލުން ބޯޑަރުތައް ހުޅުވަން ސަރުކާރުން ހުރަސް އެޅި ގޮތް ހާމަ ކޮށްދެއްވާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

Ads by MWSC

ރައީސް ނަޝީދު މިހެން ވިދާޅުވީ ރައްޔިތުންގެ މަޖިލީހަށް މިއަދު ހުށަހެޅުނު ފޮރިން ސާވިސް ބިލުގެ ބަހުސްގައި ދާންދޫ ދާއިރާގެ މެންބަރު ޔައުގޫބް އަބްދުﷲ ދެއްކެވި ވާހަކަތަކަށް ރައްދު ދެއްވަމުންނެވެ.

މެންބަރު ޔައުގޫބް ވިދާޅުވީ ކޮވިޑަށް ފަހު އެންމެ ހަލުވިކަމާ އެކު ކުރިއަރަމުން އަންނަ ގައުމުތަކުގެ ތެރޭގައި ރާއްޖެ ހިމެނޭ ކަމަށާއި އެކަމަށް ޓަކައި ރައީސް އިބްރާހިމް މުހައްމަދު ޞާލިޙާއި އަދި ވަކިން ހާއްސަކޮށް އިގްތިސާދީ ވަޒީރުގެ ހިންގުންތެރި ގާބިލުކަމަށް ޓަކައި ޝުކުރު ދަންނަވާ ކަމަށެވެ.

އެ ވާހަކަތަކާ ގުޅޭގޮތުން ރައީސް ނަޝީދު ވިދާޅުވީ ބޯޑަރު ހުޅުވުމާ ގުޅޭ ގޮތުން މަޖިލީހުގެ ކޮމިޓީތަކުގައި ދެކެވުނު ވާހަކަތަކާއި، ސަރުކާރުން އެކަމަށް ހުރަސް އަޅުއްވަމުން ގެންދެވި ގޮތް އަދި މަޖިލީހުގެ ބައެއް މެންބަރުން ވެސް އެކަމާ ނުރުހުން ފާޅުކުރި ގޮތް ސާފުކޮށް ދިވެހި ރައްޔިތުންނަށް އެނގޭނެ ގޮތް ހަމަޖައްސައިދެއްވާނެ ކަމަށެވެ.

"ބޯޑަރު ހުޅުވުމާ ގުޅޭ ގޮތުން މިތަނުގެ ކޮމެޓީތަކުގައި ދެކެވުނު ވާހަތަކައި، ސަރުކާރުން އެކަމަށް ހުރަސް އަޅުއްވަމުން ގެންދިޔަ ގޮތް އަދި ބައެއް މެމްބަރުން ވެސް އެކަމާ ނުރުހުން ފާޅު ކުރަމުން ގެންދިޔަ ގޮތް ސާފުކޮށް މަޖިލީހަށާއި، ރާއްޖޭގެ ރައްޔިތުންނަށް އެނގޭނެ ގޮތަށް އަޅުގަނޑު ހަމަޖައްސައި ދޭނަން" ރައީސް ނަޝީދު ވިދާޅުވިއެވެ.

މިއަދުގެ ޖަލްސާގައި ގިނަ މެންބަރުން ވިދާޅުވީ ކޮވިޑް-19ގެ ހާލަތުގައި ރާއްޖެ ބަނޑަށް ނުޖެހި، ދަތި ހާލަތުން އަރައިގަނެވުނީ ހާރިޖީ ސިޔާސަތުގެ ހަރުދަނާވުމުން ކަމަށެވެ.