ބޮލީވުޑް ފިލްމުތަކަށް ސައުތުގެ އެހީ ބޭނުންވެފައި
އިންޑިއާގައި ބޮލީވުޑް ފިލްމުތަކަށް ޒަމާނުއްސުރ އޮތް މަގުބޫލުކަން މަޑުމަޑުން މިވަނީ ފަނޑުވާން ފަށައިފައެވެ. ސައުތު އިންޑިއާގައި މަރާޓީއާއި، ތަމިލްއާއި ތެލެގޫ ޕްރޮޑަކްޝަން ހައުސްތަކުން އުފައްދާ ފިލްމުތަކަށް ނޯތު އިންޑިއާގައި ވެސް ބޮޑު ޑިމާންޑެއް އަންނަނީ އުފެދެމުންނެވެ.
އިންޑިއާ ސިނަމާގެ ތާރީހުގައި ރެކޯޑުތަކެއް މުގުރައިލި ތެލެގޫ ފިލްމު "ބާހޫބަލީ"އަށް ފަހު ސައުތު އިންޑިއާގެ ގިނަ ފިލްމުތައް ރިލީޒްކުރަންފެށީ މަލްޓި ލޭންގުއޭޖުކޮށެވެ. މީގެ ސަބަބުން ބޮލީވުޑް ފިލްމުތައް ކުރިން ބަލަމުން އައި އޯޑިއެންސްގެ ބޮޑު ތަރުހީބެއް ސައުތު އިންޑިއާގެ ފިލްމުތަކަށް ވެސް ލިބެން ފެށިއެވެ.
މިދިޔަ އަހަރާއި މިއަހަރު ވެސް އިންޑިއާ ސިނަމާގައި އެންމެ ބޮޑު ކާމިޔާބެއް ހޯދީ ސައުތު އިންޑިއާގެ ފިލްމުތަކެވެ. ބޮލީވުޑް ފިލްމުތަކުގެ ތެރެއިން ހިޓް ޓެގު އެޅުވުނީ މަދު ފިލްމެއްގައެވެ.
މިހާރު ސިނަމާގައި އަޅުވަމުންދާ "އާރްއާރްއާރް"ގެ ދިހަ ޝޯ ނުނިމެނީސް އިންޑިއާ ސިނަމާގެ މުޅި ތާރީޚް ބަދަލުކޮށްލައިފިއެވެ. 1،000 ކްރޯރް ރުޕީސްއާ އެކު މުޅިން އައު ބެންޗްމާކެއް މިފިލްމުން ގާއިމްކޮށްފިއެވެ.
މިފިލްމުގެ ކާމިޔާބީއާ ގުޅޭގޮތުން ވާހަކަދައްކަމުން އެކްޓަރު ސަލްމާން ޚާން ބުނީ ސައުތު އިންޑިއާގެ ފިލްމުތައް ނޯތު އިންޑިއާގައި މިހައި ކާމިޔާބުކަމާ އެކު އަޅުވަމުންދާއިރު ނޯތު އިންޑިއާގެ ފިލްމުތަކަށް ސައުތުގައި މާބޮޑު ތަރުހީބެއް ނޯންނަނީ ކީއްވެގެންތޯ ސުވާލު އުފައްދަން ޖެހޭ ކަމަށެވެ. ސައުތު އިންޑިއާގެ ފިލްމުތައް މޮޅުކަން ސަލްމާން ވެސް ފާހަގަކުރިއެވެ. އެކަމަކު ބޮލީވުޑްގައި ވެސް އެފެންވަރުގެ ފިލްމުތައް އުފައްދާކަމަށް އޭނާ ބުންޏެވެ.
ސައުތުގައި އުފެއްދި އެންމެ ކާމިޔާބު މަލްޓި ލޭންގުއޭޖް އެއް ފިލްމު "ކޭޗީއެފް ޗެޕްޓާ ވަން"ގެ ދެވަނަ ޗެޕްޓާ ރިލީޒްކުރަން ދަނީ ތައްޔާރުވަމުންނެވެ. އެފިލްމުގައި ބޮލީވުޑްގެ ދެ އެކްޓަރަކު ވެސް ފެންނާނެއެވެ. ލީޑް ރޯލު ކުޅޭނީ ސައުތުގެ ސުޕަސްޓާ ޔަޝްއެވެ.
ސަލްމާން ދެއްކި ވާހަކަތަކާ ގުޅިގެން ޔަޝް ވަނީ ވާހަކަ ދައްކައިފައެވެ. އޭނާ ބުނީ ހަގީގަތުގައި ސައުތުގެ ފިލްމުތައް އެންމެ ފުރަތަމަ ނޯތު އިންޑިއާއަށް ފެންނަން ފެށީ މަރާޓީ، ތެލެގޫ ނުވަތަ ތަމިލްއިން އުފައްދާ ފިލްމުތައް ހިންދީ ބަހުން ޑަބްކޮށްގެން ޓީވީތަކުން ދުރަށް ދައްކަން ފެށުމުންކަމަށެވެ. އޭރު ސައުތުގެ ފިލްމުތައް ބެލުންތެރިންނަށް ވީ ބޮޑު ޖޯކަކަށްކަމަށް ވެސް ޔަޝް ބުންޏެވެ. ޔަޝް ބުނީ ސައުތުގެ ފިލްމުތައް ޖޯކަކަށް ވާން ފެށީ ޑަބްކޮށްފައި ހުންނަ ގޮތުން ކަމަށެވެ.
އެހެން ނަމަވެސް މިފަދަ ފިލްމުތައް ބެލުންތެރިންނަށް ފެނުމުން ސައުތު ފިލްމުތަކުގައި ވާހަކަ ކިޔައިދޭ ގޮތް ކަމުދިޔަކަން ފާހަގަކުރެވުނުކަމަށް ޔަޝް ބުންޏެވެ. އެއާ އެކު ވެސް ސައުތުގެ ޕްރޮޑިއުސަރުން ހިންދީ އޯޑިއެންސަށް ވިޔަފާރިއެއްގެ ގޮތުން ފިލްމުތައް ދައްކަން އޭރު ބޭނުން ނުވީކަމަށް އޭނާ ބުންޏެވެ.
ސައުތު ޕްރޮޑިއުސަރަކު ހިންދީ ބަހުން ވެސް ފިލްމެއް ރިލީޒްކުރަން ނިންމި ނިންމުމަކީ ބޮޑު ރިސްކެއް ކަމަށާއި އެހެން ނަމަވެސް އެ ރިސްކަށް ފަހު ބެލުންތެރިންގެ ފަރާތުން ބޮޑު ތަރުހީބެއް ސައުތުގެ ފިލްމުތަކަށް ވެސް އޮތްކަން ފާހަގަކުރެވުނުކަމަށް ޔަޝް ބުންޏެވެ.
އެހެންކަމުން ބޮލީވުޑް ފިލްމު އުފައްދާ ފަރާތްތަކުން ހަމައެކަނި ހިންދީ ފިލްމުތަކުން ފިލްމު ރިލީޒްކުރުމުގެ ބަދަލުގައި މަރާޓީ، ތަމިލް ނުވަތަ ތެލެގޫ ބަހުން ވެސް ފިލްމުތައް ޑަބްކޮށް ރިލީޒް ކުރުމަށް ޔަޝް އެދެއެވެ. އޭރުން ބޮޑު އޯޑިއެއްސެއް ބޮލީވުޑް ފިލްމުތައް ވެސް ބަލަން ގޮސްދާނެކަމަށް އޭނާ ބުންޏެވެ.
އިންޑިއާގައި ބޮލީވުޑް ތަރިންނަށް ޑިމާންޑު ދަށްވެދާނެކަމުގެ ބިރު ހީވެފައި އޮންނަތާ ދުވަސްތަކެއް ވެއްޖެއެވެ. މިހާރު ގިނަ ފިލްމީ ތަރިން ވެސް މަސައްކަތް ކުރަން ބޭނުންވަނީ ސައުތުގެ ޑައިރެކްޓަރުންނާއި ޕްރޮޑިއުސަރުންނާ އެކުގައެވެ. އަނެއްކޮޅުން ބޮލީވުޑްގެ ޕްރޮޑިއުސަރުން ދަނީ ސައުތު އިންޑިއާގެ ފިލްމުތަކަށް ވެސް ފަންޑުކުރަމުންނެވެ.
މިއާ އެކު ބޮލީވުޑް ފިލްމުތައް ދެން ބެލުންތެރިންގެ މެދުގައި މަގްބޫލުކަން ހޯދާނީ އިންޑިއާގައި ވާހަކަދައްކާ އެހެން ބަހުރުވަތަކުން ޑަބްކޮށްގެންކަމަށް ބެލުމުގެ ފުރުސަތު އެބަ އޮތެވެ. ސައުތުގެ އޯޑިއެންސް ގެއްލޭ ނަމަ ހިންދީ ފިލްމުތަކަށް ކުރިއަށް ދިޔުމުގެ ފުރުސަތު ވަރަށް ކުޑަވެއެވެ.
