ފައްޔާޒް މަސައްކަތް ކުރަނީ އެމްޑީޕީ ހަލާކުކޮށްލަން: އިންތި
ވެރިކަން ކުރާ މައި ޕާޓީ، އެމްޑީޕީގެ ޗެއަރޕާސަންގެ މަގާމަށް ވާދަކުރައްވާ އިކޮނޮމިކް މިނިސްޓަރ ފައްޔާޒް އިސްމާޢީލް މަސައްކަތް ކުރައްވަނީ ޕާޓީ ބައިބައިކޮށް ހަލާކުކޮށްލަން ކަމަށް ޗެއާޕާސަން ކަމަށް ފައްޔާޒާ ވާދަކުރައްވާ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވެއްޖެއެެވެ.
އިންތި މިފަދައިން ވިދާޅުވީ ކެމްޕެއިން ދަތުރުުފުޅެއްގައި ހައްދުއްމަތީ ގަމަށް ވަޑައިގެން ބޭއްވި ބައްދަލުކުރެއްވުމުގައި ދެއްކެވި ވާހަކަފުޅުގައެވެ.
އިންތި ވިދާޅުވީ ފައްޔާޒު މަސައްކަތް ކުރަނީ އެ ޕާޓީއަށް 2023ގެ ރިޔާސީ އިންތިޚާބު ގެއްލުވާލަން ކަމަށެވެ. އަދި ޕާޓީ ބައިބައިކޮށްގެން ބާރުވެރިކަން ހޯދައިގެން އެ އިންތިޚާބު ކާމިޔާބު ނުކުރެވޭނެ ކަމަށް އިންތި ވިދާޅުވިއެވެ.
"ހަމަ ޝައްކެއް ނެތް އެ މަގަށް އެ މަސައްކަތް ކުރަނީ މި ޕާޓީ ހަލާކުކޮށް. މި ޕާޓީ ފަޅާލަން މި ޕާޓީއަށް 2023 ގެއްލުވާލަން މަސައްކަތް ކުރާ މީހުން. އެއީ ޝައްކެއް އޮތް ކަމެއް ނޫން” އިންތި ވިދާޅުވިއެވެ.
މީގެ އިތުރުން އިންތި ވިދާޅުވީ ޗެއާޕާސަން ކަމަށް އޭނާއާ ވާދަކުރައްވާ ކެނޑިޑޭޓަކީ އެއްވެސް ހާއްސަ ސިފައެއް ލިބިގެންވާ ބޭފުޅެއް ނޫން ކަމަށެވެ.“އަޅުގަނޑުމެންނަކާ ގާތް ވެސް ނުކުރެވޭނެ އަޅުގަނޑުމެންގެ ވާދަވެރިންނަކާ”އިންތި ވިދާޅުވިއެވެ.
ބަޔަކު ބައިވެރިވެގެން މިހާރު ކުރަމުން އެދާ މަސައްކަތަކީ އެމްޑީޕީގެ ޖޯޝު ކުޑަކޮށްލަން ކުރާ މަސައްކަތެއް ކަމަށާއި ވަޒީފާގެ ބިރު ދެއްކުމާއި ވިޔަފާރިތަކުގެ ހާސްކަން ފިލުވާލަން އިންތިޚާބާ ދިމާކޮށް ނުފޫޒުން މަސައްކަތް ކުރަމުން ދާކަމަށް ވެސް އިންތި ވިދާޅުވިއެވެ.
