ޢަދާލަތު ޕާޓީން ވެސް ވަގު ފޯމް ހުށަހަޅާ މައްސަލައެއް!
އިލެކްޝަންސް ކޮމިޝަން (އީސީ)އަށް ވަގު ފޯމްތަކެއް ހުށަަހަޅައިގެން އަދާލަތު ޕާޓީގެ ދަފުތަރަށް މެމްބަރުން އިތުރުކުރި މައްސަލައެއް ފެންމަތިވެއްޖެއެވެ.
މިކަން ހާމަކޮށްފައި ވަނީ އިދިކޮޅު ޕީޕީއެމްއިންނެވެ. އަދާލަތުން ވަގު ފޯމް ހުށަހެޅި މީހެއްގެ ފޯމާއި އޭނާގެ ވާހަކަ ޕީޕީއެމްއިން ވަނީ އާންމުކޮށްފައެވެ. އެ މައުލޫމާތުތަކަށް ބަލާއިރު މ.އެތުމާގެ ޝަރީފާ ޢަލީއާއި އޭނާގެ ޢާއިލާ މެމްބަރުން ވަނީ ޢަދާލަތު ޕާޓީއަށް ވައްދައިފައެވެ.
އެ މައްސަލައިގައި ޝަރީފާ ބުނެފައި ވަނީ އެ އާއިލާގެ އެންމެންނަކީ ވެސް ޕީޕީއެމްގެ ސަޕޯޓަރުން ކަމަށާއި އާއިލާގެ 13 މީހުން ޕީޕީއެމްއަށް ސޮއިކޮށްފައި ތިބޭނެ ކަމަށެވެ. ނަމަވެސް ދާދި ފަހުން ބަލައިލިއިރު އެންމެން ތިބީ އަދާލަތު ޕާޓީއަށް ވައްދައިފައި ކަމަށެވެ.
"އަހަރެން ވެސް އަހަރެންގެ ފިރިމީހާ ވެސް ، އަހަރެންގެ ދަރިފުޅުމެން ވެސް އަދާލަތު ޕާޓީގައި ، މީ ކިހިނެއްވީ ކަމެއްތޯ ބަލަން އިލެކްޝަނަށް ސިޓީލީ، އެމީހުން ބުނީ ކަލޭމެން ގަބޫލުނުވާ ކަމަށް ވަންޏާ ވަކިވާން ސިޓީލާށޭ، އަހަރެން ބުނީ އެއެއް ނޫނޭ ބޭނުމީ، އަހަރެން ބޭނުން ވަނީ އަހަރެންގެ ނަމުގައި އެތަނަށް ވައްދައިފައި އޮތް ފޯމޭ"ޝަރީފާ ބުންޏެވެ.
ޝަރީފާ ބުނީ ފޯމް ހޯދަން އެދުމުން ފޯމް ނުލިބޭނެ ކަމަށް އިލެކްޝަނުން ފުރަތަމަ ވިދާޅުވިކަމަށެވެ. އޭގެ ފަހުން އެ ކޮމިޝަންގެ ރައީސް ފުއާދު ތައުފީގާ ބައްދަލުކޮށް އެ ވާހަކަ ދެންނެވުމުން ސިޓީއެއް ހުށަހެޅުމަށް ވިދާޅުވިކަމަށާއި އޭރުން ފޯމް ދެއްވާނެކަމަށް ވިދާޅުވި ކަމަށެވެ.
ޝަރީފާ ވަނީ އެ އާއިލާ ބައެއް މެމްބަރުންގެ ފޯމްތައް އާންމުކޮށް ހިއްސާކޮށްފައެވެ. ހިއްސާކުރި ތިން ފޯމުން ވެސް ފެންނަނީ އެކެއްގެ ފިންގަރ ޕްރިންޓެވެ. އަދި ހިއްސާކޮށްފައިވާ ޝަރީފާގެ ފިންގަރ ޕްރިންޓާއި އެ ފޯމުން ފެންނަ ޕްރިންޓް އެއްގޮތަކަށް ވެސް ދިމާނުވާކަން ފާހަގަކޮށްލެވެއެވެ.
" މިހިރީ މި ފޯމްތައް ނަގައިފައި ، އަހަރެން ބޭނުން ޝަރީޢަތުގައި މި މައްސަލަ ޖައްސަން ، މީ އަހަރެންގެ ފިންގަރ ޕްރިންޓް ނޫންކަން އެބަ އެނގޭ، މީގައި މިހުރީ (މީހެއްގެ) ފައިގެ ބޮޑުވައި އިނގިލީން ޖައްސައިފައި، މިހާ ބޮޑު ވައްކަން އަދާލަތުން ކުރަނީ"ޝަރީފާ ބުނެފައި ވެއެވެ.
ސަރުކާރު ހިންގާ ކޯލިޝަންގެ ޕާޓީތަކަށް މެމްބަރޝިޕް އިތުރުކޮށްދިނުމަށް އިލެކްޝަނުން މަސައްކަތްކޮށްދޭކަމަށް އިދިކޮޅުން ތުހުމަތުކުރެއެވެ. މި ގޮތުން ވަގު ފޯމް އެޕްރޫވްކޮށްދީ އެކަން ކޮށްދިނުމުގައި އެންމެ ބޮޑަށް އެހީތެރިވަނީ އެ ކޮމިޝަންގެ ނައިބު ރައީސް އިސްމާޢީލް ޙަބީބުކަމަށް ވެސް އިދިކޮޅުން ވަނީ ހާމަކޮށްފައެވެ.
ހަބީބު ބޭނުންބަޔަކު އަބަދު ފޮނުވާނީ ބައި އިލެކްޝަންތަކުގައި ވެސް . ހީވަނީ މިއީ އޭނަގެ ތަރިކަ މުދަލެއްހެން.