ރައީސް ނަޝީދަށް ދިން ހަމަލާއަށް އަހަރެއް: އާއިލާއިން އެދެނީ ފަންޑު ކުރި މީހުން ހޯދައި، އިންސާފު ގާއިމް ކުރުމަށް

ރައްޔިތުންގެ މަޖިލީހުގެ ރައީސް, ރައީސް މުހައްމަދު ނަޝީދު އަވަހާރަކޮށްލުމަށް މިދިޔަ އަހަރުގެ މެއި މަހުގެ ހަވަނަ ދުވަހު ދިން ނިރުބަވެރި ހަމަލާއަށް އަހަރެއް ވާއިރު، އެ ހަމަލާގެ ފުރިހަމަ ތަހުގީގެއް އަދިވެސް ހެދިފައި ނުވާކަމަށާއި އިންސާފު ގާއިމްވެފައި ނުވާ ކަމަށް ބުނެ އެ މަނިކުފާނުގެ އާއިލާއިން ކަންބޮޑުވުން ފާޅުކޮށްފިއެވެ.

Ads by MWSC

ރައީސް ނަޝީދަށް ދިން ހަމަލާއަށް އަހަރެއް ވާނީ މާދަމާއަށެވެ. މިދިޔަ އަހަރުގެ އެ ދުވަހު ގ. ކެނެރީގެއިން ނުކުމެ ވަޑައިގެން ކާރުކޮޅަށް އަރުއްވަން ދިޔަ މަގުމަތީގައި، ސައިކަލެއްގައި ހަރުކޮށްފައި އޮތް ބޮމެއް ގޮއްވައިލައިގެން ރައީސް ނަޝީދަށް ދިން އެ ހަމަލާގެ ސަބަބުން އެ މަނިކުފާނަށް ވަރަށް ބޮޑެތި ޒަޚަމްތަކެއް ލިބުނެވެ. އެ ޒަޚަމްތަކަށް އޭޑީކޭ ހޮސްޕިޓަލުގެ ޑޮކްޓަރުންގެ ޓީމަކުން ފަރުވާ ދިނުމަށް ފަހު، އިތުރު ފަރުވާއަށް، ވަރުގަދަ ސެކިއުރިޓީއަކާ އެކު އެ މަނިކުފާނު ޖަރުމަނަށް ފޮނުއްވިއެވެ. ޖަރުމަނުގައި ގިނަ ދުވަސްތަކެއް ފަރުވާފައި ހޭދަ ކުރެއްވުމަށް ފަހު އަނެއްކާ ވެސް އިތުރު ފަރުވާއަށް އެ މަނިކުފާނު ވަޑައިގަތީ އިނގިރޭސިވިލާތަށެވެ.

ރައީސް މުހައްމަދު ނަޝީދަށް ދިން މިހަމަލާ ދިނުމުގައި އަމަލީގޮތުން ހަރަކާތްތެރިވި މީހުން ވަނީ ހައްޔަރުކޮށްފައެވެ. މި ހަމަލާ ދިނުމުގައި ބޮން ގޮއްވައިލިކަމަށް ބުނެފައިވާ އަދުހަމް އަހްމަދު ރަޝީދަށް ވަނީ 23 އަހަރުގެ ޖަލު ހުކުމެއް ވެސް އިއްވައިފައެވެ. ނަމަވެސް މި މައްސަލައިގައި ހައްޔަރުކޮށްފައި ދެން ތިބި މީހުންގެ ޝަރީއަތް އަދި ނިމިފައެއް ނުވެއެވެ.

މިކަމާ ގުޅިގެން ކަންބޮޑުވުން ފާޅުކޮށް ރައީސް ނަޝީދުގެ އާއިލާއިން މިއަދު ނެރުނު ބަޔާނެއްގައި ގޮވައިލައްވައިފައި ވަނީ ފުރިހަމަ ތަހުގީގެއް ހެދުމަށާއި ރައީސް ނަޝީދަށް ހަމަލާދިނުމަށް ފަންޑުކުރި މީހުން ވެސް ހޯދައި އިންސާފު ގާއިމް ކުރުމަށެވެ.