ރައީސް ނަޝީދު ބޭނުން ކުރައްވަނީ ކެންޕެއިން ޓޫލެއްގެ ގޮތުގައި، އަޅުގަނޑު ނަމަވެސް ބޭނުން ކުރާނަން: ފައްޔާޒް
އެމްޑީޕީގެ ރައީސް މުޙައްމަދު ނަޝީދު ޕާޓީގެ ލީޑަރޝިޕުން ބޭރު ކުރަން އުޅޭ ކަމަށް ބުނެ ދެކެވޭ ވާހަކަތަކަކީ، ކެންޕެއިން ޓޫލެއް ކަމަށާއި، އެއީ މައްސަލައެއް ނޫން ކަމަށް ޗެއަރޕާސަންކަމުގެ މަޤާމަށް ވާދަ ކުރައްވާ އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެއްޖެއެވެ.
މިމަހު 14ވަނަ ދުވަހު އޮންނަ ޗެއަރޕާސަން އިންތިޚާބުގެ ކެންޕެއިން ފޯރި ވަރަށް ގަދަވެފައިވާއިރު، އިންތިޚާބުގައި ދެން ވާދަ ކުރައްވާ އިމްތިޔާޒް ފަހުމީގެ ޓީމުގެ މެންބަރުން ގެންދަވަނީ، ފައްޔާޒް އިންތިޚާބު ކާމިޔާބު ކުރައްވައިފި ނަމަ ރައީސް ނަޝީދު އެމްޑީޕީން ބޭރު ކުރާނެ ކަމަށް ވިދާޅުވަމުންނެވެ.
މިކަމަށް ރައްދު ދެއްވަވައި، ރޭ ފުވައްމުލައް ސިޓީގައި ބޭއްވި ޖަލްސާއެއްގައި ފައްޔާޒް ވިދާޅުވީ، ވާދަވެރި ފަރާތްތަކުން ރައީސް ނަޝީދަށް އެމްޑީޕީގައި އޮތް ލޯބި ބޭނުންފުޅު ކުރައްވަނީ ކެންޕެއިން ޓޫލަކަށް ކަމަށެވެ. އަދި ރައީސް ނަޝީދު ވަކި ކުރަން އުޅެޔޭ ބުނީމާ، އެމްޑީޕީ މެންބަރުން އިތުރު އަޑެއް އަހާކަށް، ކަމުގެ ޙަޤީޤަތް ބަލާކަށް ވެސް ބޭނުން ނުވާނެ ކަމަށް ވިދާޅުވިއެވެ.
"ރައީސް ނަޝީދު ބޭރުކުރަން އުޅޭ ވާހަކަ. އަޅުގަނޑަށް ހީވަނީ އެއީ ވަރަށް ވަރުގަދަ، އެ ބޭފުޅުންގެ ކެންޕެއިނަށް ވަރަށް ބޮޑު ކުރިއެރުމެއް ލިބޭ ކަމެއްހެން. ރައީސް ނަޝީދުގެ އޮތް ލޯބި، އެމްޑީޕީ މެންބަރުންގެ ހިތުގައި ރައީސް ނަޝީދަށް އޮތް ލޯބި، އެއާ ކުޅެލެވޭނެ އެއްޗެއް ކެންޕެއިންގެ ބޭނުމަށް ޓަކައި. މިކަހަލަ ވާހަކައެއް ދެއްކީމަ އިތުރު އަޑެއް އަހާކަށް ވެސް މީހަކު ބޭނުމެއް ނުވާނެ. އިތުރަށް ބަލާކަށް ވެސް މީހަކު ބޭނުމެއް ނުވާނެ. އަޅުގަނޑު ނަމަވެސް، އަޅުގަނޑު އަތުގައި އެވަރުގެ އެއްޗެއް އޮތް ނަމަ މޮޅުވަން ބޭނުން ކުރާނަން." ފައްޔާޒް ވިދާޅުވީ ހަނގުރާމައާއި، ސިޔާސީ ކަންކަމުގައި ކޮންމެ ކަމެއް ވެސް ވަރިހަމަވާނެ ކަމަށް އެ މަނިކުފާނު ޤަބޫލުފުޅު ކުރައްވާ ކަމަށާއި، އެ މަނިކުފާނަށް ހަޖަމުވާނެ ކަމަށެވެ.
ފައްޔާޒްގެ ކެންޕެއިންގައި ބޭނުން ކުރަމުން އަންނަ "ހިންގާލަން" ޝިއާރަކީ، ޕާޓީގެ ކަންކަން މަޑުޖެހިފައި އޮތުމުން އެކަން ހިންގާލުން ކަމަށް ވިދާޅުވިއެވެ. އަދި އެއީ އެއްވެސް ބޭފުޅެއް ކުޑައިމީސް ބަހެއް ބުނުމުގެ ބޭނުމުގައި ބޭނުން ކުރާ ޝިއާރެއް ނޫން ކަމަށް ވިދާޅުވިއެވެ. އަދި ހިންގާލުމީ އެމްޑީޕީއަށް ޚިދުމަތްތެރި ފަރާތްތައް ވަކި ކުރުން ނޫން ކަމަށާއި ބޭނުން ވަނީ އެކުގައި މަސައްކަތް ކުރައްވަން ކަމަށް ވެސް ފަޔާ ވިދާޅުވިއެވެ.
"އަޅުގަނޑު ޤަބޫލު ކުރަނީ، އަޅުގަނޑު މަޤާމާ ހަވާލުވީމާ، ހިތުގައި ބުރަ ކަމެއް ނެތި އަޅުގަނޑާއެކީ މަސައްކަތް ކުރައްވާނެ ކަމަށް" ފަޔާ ވިދާޅުވިއެވެ.
Ads by STO
