ލަންކާގައި ތިބި ދިވެހިންނަށް އެހީވުމަށް އިދިކޮޅުން ގޮވައިލައިފި
ސްރީލަންކާގައި ތިބި ދިވެހިންގެ ސަލާމަތާއި ރައްކާތެރިކަން ކަށަވަރުކޮށް، ބޭނުންވާ އެހީތެރިކަން ފޯރުކޮށްދިނުމުގެ ފިޔަވަޅުތައް އަވަސް ކުރުމަށް ސަރުކާރަށް އިދިކޮޅުން ގޮވައިލައިފިއެވެ.
އިދިކޮޅު ކޯލިޝަނުން ނެރުނު ބަޔާނެއްގައި ވިދާޅުވީ، އަވަށްޓެރި ސްރީލަންކާ ރައްޔިތުންގެ މެދުގައި އުފެދިފައިވާ ނުތަނަވަސްކަމާ އެކު، ޤައުމުގެ ޙާލަތު ބަދަލުވެ، ހިނގަމުންދާ ހަމަނުޖެހުންތަކާ މެދު ކަންބޮޑުވާ ކަމަށެވެ. ސްރީލަންކާއަށް ކުރިމަތިވަމުންދާ ނުތަނަވަސް ކަމުން އަރައިގަތުމުގައި ޑިމޮކްރަސީގެ ރިވެތި އުސޫލުގެ ބޭނުން ހިފައި ޤައުމާއި ރައްޔިތުންނަށް ހަމަޖެހުން ލިބި ޤައުމުގެ ޙާލަތު ޢާންމު ޙަލަތަކަށް ބަދަލުވެގެން ދިއުމަކީ އެކޯލިޝަނާއި ދިވެހި އެންމެހާ ރައްޔިތުންގެ އުންމީދެއްކަމަށާއި، ސްރީލަންކާއަށް ކުރިމަތިވެފައިވާ ނުތަނަވަސްކަމުގެ ތެރެއިން އެ ޤައުމުގައި ދިރިއުޅޭ އެންމެހައި ދިވެހިންގެ ސަލާމަތާއި ރައްކާތެރިކަން ކަށަވަރު ކުރުމުގެ ގޮތުން އަޅަން ޖެހޭ އެންމެހައި ފިޔަވަޅުތައް އެޅުމަށް ވަނީ ގޮވައިލައިފައެވެ.
މީގެ އިތުރުން، ބޭނުންވާ އަސާސީ އަދި ޒަރޫރީ ޚިދުމަތްތައް ފަސޭހަކަމާ އެކު ފޯރުކޮށްދެވޭނެ އިންތިޒާމުތައް ހަމަޖެއްސުމަށާއި އެ ޤައުމުގައި ދިރިއުޅޭ އެންމެހައޮ ދިވެހިންގެ ހާލު ގާތު ބަލާ، ބޭނުންވާ އެހީތެރިކަން ދެނެގަނެ، އެހީތެރިކަން ފޯރުކޮށްދިނުމުގެ އަވަސް ފިޔަވަޅުތަކެއް އެޅުމަށް ވެސް އިދިކޮޅުގެ ބަޔާނުގައިވެއެވެ.
އިދިކޮޅުގެ ބަޔާނުގައި އިތުރަށް ވިދާޅުވީ، މިޙާލަތުގައި އެނބުރި ރާއްޖެ އަންނަން ބޭނުންވެފައި ތިބި ދިވެހި ރައްޔިތުންނަށް އެ ފަދަ އިންތިޒާމުތައް ފަސޭހަކަމާއެކު ހަމަޖައްސައިދިނުމަށް ވެސް ގޮވައިލާ ކަމަށާއި، ބަދަލުވަމުންދާ ޙަލާތާއި ގުޅިގެން ކުރިމަތިވެދާނެ އެންމެހައި ނުރައްކާތަކުން ސަލާމަތްވެ ތިބުމަށް އެ ޤައުމުގައި ދިރިއުޅޭ އަދި ދަތުރު ކުރާ އެންމެހައި ދިވެހިންނަށް އިލްތިމާސްކުރާ ކަމަށެވެ.
Ads by STO
