ޗެއާޕާސަން އިންތިޚާބު: ދެ ރައީސުން ވޯޓްލައްވައިފި
އެމްޑީޕީގެ ޗެއާޕާސަންގެ މަގާމަށް ބޭފުޅަކު އިންތިޚާބު ކުރުމަށް ކުރިއަށްގެންދާ އިންތިހާބުގައި މަޖިލީހުގެ ރައީސް މުހައްމަދު ނަޝީދު އަދި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވޯޓު ލައްވައިފިއެވެ.
ރައީސް ޞާލިޙް ވޯޓު ލައްވައިފައި ވަނީ ދަރުމަވަންތަ ސްކޫލްގައި ބަހައްޓާފައި ހުރި ވޯޓު ފޮއްޓަށެވެ. ރައީސް ނަޝީދު ވޯޓު ލައްވައިފައިވަނީ ޖަމާލުއްދީން ސްކޫލުގައި ބަހައްޓާފައިވާ ވޯޓު ފޮއްޓަށެވެ.
މިއަދު ކުރިއަށްދާ އެމްޑީޕީގެ ޗެއާޕާސަން އިންތިޚާބުގައި ޖުމްލަ 94،211 މެމްބަރުންނަށް ވޯޓްލުމުގެ ޙައްޤު ލިބިގެންވެއެވެ. އަދި އަންހެނުންގެ ރޫހުގެ ރައީސް އިންތިޚާބުކުރަން 41،027 މެމްބަރުންނަށް ވޯޓުލުމުގެ ޙައްޤު ލިބިގެންވާ އިރު ޔޫތު ވިންގުގެ ރައީސް އިންތިޚާބުކުރަން 32،057 މެމްބަރުންނަށް ވޯޓުލެވޭނެއެވެ.
ހެނދުނު 9:00ގައި ފެށި މި އިންތިޚާބުގެ ވޯޓްލުން ހަވީރު 4:00ގެ ނިޔަލަށް ކުރިއަށްދާނެއެވެ.
ޗެއަރޕަރސަންގެ އިންތިޚާބުގައި ވާދަކުރައްވާ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި) އާއި އިކޮނޮމިކް މިނިސްޓަރު ފައްޔާޒު އިސްމާއީލްގެ ޓީމުން ވެސް ވަނީ ރާއްޖޭގެ ހުރިހައި ރަށަކަށް ދަތުރުކުރައްވައި ވާދަވެރި ކެމްޕޭނެއް ކުރައްވައިފައެވެ.
