ރައީސް ޞާލިޙް ދެވަނަ ދައުރަކަށް ކުރިމަތިލައްވާނެ ކަމަށް ނުދެކެން: ރައީސް ނަޝީދު
ދެން އަންނަ ރިޔާސީ އިންތިޚާބެއްގައި މިހާރުގެ ރައީސް އިބްރާހިމް މުހައްމަދު ޞާލިޙް ވާދަކުރައްވާނެކަމަށް ދެކިވަޑައިނުގަންނަވާ ކަމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވެފައި ވަނީ، ދިވެހި ޗެނަލްއިން ގެނެސްދިން ޕްރޮގުރާމެއްގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.
2023 ވަނަ އަހަރުގެ އިންތިޚާބުގައި ރައީސް ނަޝީދު ބައިވެރިވެ ވަޑައިގަންނަވާންނަތޯ ސުވާލު ކުރެއްވުމުން ރައީސް ނަޝީދު ވިދާޅުވީ، އެމްޑީޕީގެ ރިޔާސީ ކެނޑިޑޭޓް ހޮވާނީ ޕްރައިމަރީއަކުން ކަމަށާއި ޕްރައިމަރީގައި އެމަނިކުފާނު ބައިވެރިވެ ވަޑައިގަންނަވާނެ ކަމަށެވެ. އަދި ރިޔާސީ އިންތިޚާބުގެ ޕްރައިމަރީގައި ރައީސް ޞާލިޙް ބައިވެރިވެ ވަޑައިގަންނަވާނެ ކަމުގެ އިޝާރާތެއް ދެއްވައިފައި ނުވާ ކަމަށާއި އެހެން ކަމުން އިންތިޚާބުގައި ރައީސް ޞާލިޙް ބައިވެރިވެ ވަޑައިނުގަންނަވާނެ ކަމަށް ފެނި ވަޑައިގަންނަވާ ކަމަށް ވެސް ރައީސް ނަޝީދު ވިދާޅުވިއެވެ.
2023ގެ ރިޔާސީ އިންތިޚާބުގައި ވާދަ ކުރެއްވުމުގެ ޝައުޤުވެރިކަން އޮތް ގާތް މި ދެ ބޭފުޅުންގެ ގުޅުން މިހައިރު ވަނީ ވަރަށް ބޮޑަށް ހީނަރުވެފައެވެ.
