އިންތިޚާބަށް ފަހު އިންތިގެ ޓީމުން ހަނު، ބަލި ޤަބޫލު ނުކުރީތަ؟
ފޯރިގަދަ ކެމްޕޭނަކަށް ފަހު އިއްޔެ ކުރިއަށްދިޔަ އެމްޑީޕީ ޗެއާޕާސަންގެ އިންތިހާބު އިކޮނޮމިކް މިނިސްޓަރ ފައްޔާޒު އިސްމާޢީލް ކާމިޔާބުކުރިކަން ކަށަވަރުވުމުން ފައްޔާޒާއެކު ދެން އެމަގާމަށް ވާދަކުރެއްވި މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ މިހައިތަނަށް އެއްވެސް އެއްޗެއް ވިދާޅުނުވުމުން ބަލި ޤަބޫލު ނުކުރެއްވީ ކަމަށް ބައެއް ފަރާތްތަކުން ސުވާލު އުފައްދައިފިއެވެ.
އިއްޔެ ކުރިއަށްދިޔަ އެމްޑީޕީ ޗެއާޕާސަންގެ އިންތިހާބު ކުރިޔަށްދިޔަ ވަގުތު އިންތިގެ ޓީމުން ދިޔައީ ގިނަ ޝަކުވާތަކެއް ހުށަހަޅަމުންނެވެ.
އޭގެ ތެރޭގައި ހަވީރު ހަތަރެއް ޖަހަންދެން ކުރިއަށް ގެންދަން ނިންމި ވޯޓް ނެގުން އިތުރު ދެ ގަޑިއިރަށް ދަންމައިލީ އުސޫލުތަކާ ޚިލާފަށް ކަމަށް ވިދާޅުވެފައެވެ. އަދި ވޯޓްލާ ވަގުތު އިތުރުކުރީ ހަތަރެއް ޖެހި ފަހުން ކަމަށާއި އެއީ އާންމު އުސޫލުން ބަލާ ނަމަ ނިންމޭނެ ނިންމުމެއް ނޫން ކަމަށް ވިދާޅުވިއެވެ.
މީގެ އިތުރުން ހައެއް ޖެހުމާ ހަމަޔަށް ވަގުތު އިތުރުކުރި ނަމަވެސް ބައެއް ރަށްރަށުގައި ހަތަރެއް ޖެހިއިރު ވޯޓުފޮށިތައް ބަންދުކޮށް ގުނަން ފަށާފައިވާ ކަމަށްވެސް އިންތިގެ ޓީމުން ވިދާޅުވިއެވެ.
އަދި އެކަމަކީ ދުނިޔޭގެ އެއްވެސް ތަނެއްގައި އަމަލު ކުރާނެ ގޮތެއް ނޫން ކަމަށާއި އެއް ބަޔަކު ވޯޓު ގުނާއިރު އަނެއް ބަޔަކު ވޯޓުލުން އެއީ އުސޫލާ ހިލާފުކަމެއް ކަމަށް ވިދާޅުވިއެވެ. މީގެ އިތުރުން ވޯޓުލާ ކަރުދާސްކޮށް ވޯޓު ފޮއްޓަށް ވައްޓައިލުމުގެ ކުރިން ދެއްކުމުގެ މައްސަލައާއި ޑަބަލްކޮށް ވޯޓުލުމުގެ މައްސަލަ ވެސް އެ ޓީމުން ކޮމިޓީއަށް ހުށަހަޅައިފައިވެއެވެ.
މީގެ އިތުރުން އިންތިގެ ޓީމުން ދިޔައީ އެއްބަޔަކު އަނެއްބަޔަކަށް ބަހުގެ ހޫނު ހަމަލަތައް ދީ ފައްޔާޒުގެ ޓީމަށް ބޮޑެތި ތުހުމަތު ކުރަމުންނެވެ. ނަމަވެސް މި ފޯރިގަދަ އިންތިހާބު އިއްޔެ ނިމި ޗެއާޕާސަންގެ މަގާމަށް ފައްޔާޒު އިންތިހާބުވެއްޖެ ކަން އެނގުމާއެކު އިންތިއަށް ތާއިދުކުރަމުން ގެންދިޔަ ފަރާތްތަކުގެ ބަހުރުވަ ވަނީ ބަދަލުވެފައެވެ.
އިންތިއަށް ތާއީދުކުރެއްވި އޭނާގެ ސަޕޯޓަރުންގެ ތެރެއިން ބައެއް މީހުން އެމްޑީޕީ ދޫކޮށްލާކަމަށް ވެސް ބުނެފައިވެއެވެ. އެމްޑީޕީގެ ބައެއް ސަޕޯޓަރުން ބުނާގޮތުން އިންތިޚާބުގެ ނަތީޖާއާ އެކު މިއީ ޕީޕީއެމްއާ ގުޅެންވީ ވަގުތު ކަމަށެވެ.
މި އިންތިޚާބުގައި ފައްޔާޒާއި އިންތި ވާދަކުރެއްވި ނަމަވެސް ބައެއް ފަރާތްތަކުން ސިފަކުރާ ގޮތުގައި މިއީ ރައީސް ޞާލިހާއި ރައީސް ނަޝީދުގެ ކުރިމަތިލުމެކެވެ. ސަބަބަކީ އިންތިހާބުގެ ފޯރިގަދަވެ އެމްޑީޕީ ދެ ފެކްޝަނަކަށް ބެހިފައި އޮތުމުންނެވެ. މި އިންތިހާބުގައި ރައީސް ނަޝީދު ތާއީދު ކުރެއްވީ އިންތިއަށެވެ. ރައީސް ޞާލިޙް ތާއީދު ކުރެއްވީ ފައްޔާޒަށެވެ.
ފޯރިގަދަ ކެމްޕެއިނަކަށް ފަހު އެމްޑީޕީގެ ޗެއާޕާސަންގެ މަގާމު އިކޮނޮމިކް މިނިސްޓަރު ފައްޔާޒް އިސްމާއީލް ކުރިހޯއްދެވީ ޖުމްލަ ވޯޓުގެ 58 އިންސައްތަ ކާމިޔާބުކޮށްގެންނެވެ. އޭނާއާ ވާދަކުރެއްވި އިމްތިޔާޒް ފަހުމީއަށް ލިބުނީ ޖުމްލަ ވޯޓުގެ 42 އިންސައްތައެވެ.
Ads by STO
