ފަޔާގެ ޗެއަރޕާސަންކަމުގައި އެމްޑީޕީން އިތުރު ކާމިޔާބީތައް ހޯދާނެކަމާ މެދު ޝައްކެއް ނުކުރަން: ރައީސް ނަޝީދު
އިއްޔެ ކުރިޔަށް ދިޔަ އެމްޑީޕީގެ އެތެރޭގެ އިންތިޚާބުގައި ޗެއަރޕާސަން ކަމުގެ މަޤާމަށް އިންތިޚާބުވި، އިކޮނޮމިކް މިނިސްޓަރު ފައްޔާޒް އިސްމާއީލަށް، އެމްޑީޕީގެ ރައީސް، ރައީސް މުޙައްމަދު ނަޝީދު މަރުޙަބާ ވިދާޅުވެއްޖެއެވެ.
މި އިންތިޚާބު ފައްޔާޒް ކާމިޔާބު ކުރެއްވީ 58 އިންސައްތަ ވޯޓާއެކުގައެވެ. އިންތިޚާބުގައި ރައީސް ނަޝީދު ތާއީދު ކުރައްވައިފައި ވަނީ، އިންތިޚާބުން ބަލިވެ ވަޑައިގެންނެވި އިމްތިޔާޒް ފަހުމީއަށެވެ.
ރައީސް ނަޝީދު ދެންމެ ކުރެއްވި ޓްވީޓެއްގައި ފައްޔާޒަށާއި ޓީމަށް ވަނީ މަރުޙަބާ ވިދާޅުވެފައެވެ.
"ފަޔާގެ ޗެއަރޕާސަން ކަމުގައި އެމްޑީޕިއަށް އިތުރު ކާމިޔާބީތައް ހޯދާނެ ކަމީ އަޅުގަނޑުގެ ހިތުގައި ޝައްކު ހިނގާ ކަމެއް ނޫން" ރައީސް ނަޝީދު ކުރެއްވި ޓްވީޓެއްގައި ވިދާޅުވިއެވެ.
ރައީސް ނަޝީދާއި ފައްޔާޒަކީ މީގެ ކުރިން އެތައް ކަމެއްގައި ދެބަސްވެފައިވާ ދެ ބޭފުޅުންކަން ފާހަގަ ކޮށްލެވެއެވެ. މިގޮތުން ރައީސް ނަޝީދު އިސްކޮށް ހުންނަވައި ފައްޔާޒް މަޤާމުން ދުރުކުރުގެ މަސައްކަތް މަޖިލިސް ތެރެއިން ކުރެވިގެން ދިޔައެވެ. އަދި ފައްޔާޒު އުޅުއްވަނީ، ރައީސް ޔާމީންގެ ވެރިކަމުގައި އަދީބު އުޅުއްވި ގޮތަށް ބްރޯ ހެދިގެން ކަމަށް ވެސް ރައީސް ނަޝީދު ތުހުމަތު ކުރެއްވިއެވެ. ފައްޔާޒް ވެސް ވަނީ ފަހަކަށް އައިސް ރައީސް ނަޝީދަށް އަމާޒުކޮށް ނުސީދާ ހަމަލާތަކެއް ދީފައެވެ. މިގޮތުން އެމްޑީޕީގެ ޤައުމީ ޖަލްސާއެއްގައި ރައީސް ނަޝީދަށް އަމާޒުކޮށް އަސްލު ބްރޯއަކީ ކާކުކަން އެންމެންނަށް އެނގޭނެ ކަމަށް ވިދާޅުވިއެވެ.
ޗެއަރޕާސަންގެ އިންތިޚާބަށް ފަހު އެމްޑީޕީ ބައިބައިވާނެ ކަމަށް ބައެއް ފަރާތްތަކުން ވާހަކަ ދެއްކި ނަމަވެސް، އިންތި ވެސް ވަނީ އިންތިޚާބުގެ ނަތީޖާ ޤަބޫލު ކުރައްވައި ޕާޓީއާ އެކު ދެމިހުންނަވާނެ ކަމަށް ވިދާޅުވެފައެވެ.
