ރައީސް ނަޝީދުގެ އިރުޝާދާއި އެހީތެރިކަމާ އެކު ޤައުމު ތަރައްޤީ ކުރާނަން: ފައްޔާޒް
އިއްުޔެ ކުރިޔަށް ދިޔަ އެމްޑީޕީގެ ޗެއަރޕާސަން އިންތިޚާބު ކާމިޔާބު ކުރެއްވި އިކޮނޮމިކް މިނިސްޓަރު ފައްޔާޒް އިސްމާއީލަށް ރައީސް ނަޝީދު މަރުޙަބާ ދެންނުވުމުން، ފައްޔާޒް އެކަމަށް ޝުކުރު އަދާކުރައްވައިފިއެވެ.
ރައީސް ނަޝީދު މިއަދު ކުރެއްވި ޓްވީޓެއްގައި ވަނީ ފައްޔާޒްގެ ޗެއާޕަސަން ކަމުގައި އެމްޑީޕީއަށް ކާމިޔާބީ ހޯދޭނެ ކަމާމެދު ޝައްކު ނުކުރައްވާ ކަމަށް ވިދާޅުވެފައެވެ.
"ފަޔާގެ ޗެއަރޕާސަން ކަމުގައި އެމްޑީޕީއަށް އިތުރު ކާމިޔާބީތައް ހޯދާނެ ކަމީ އަޅުގަނޑުގެ ހިތުގައި ޝައްކު ހިނގާ ކަމެއް ނޫން" ރައީސް ނަޝީދު ކުރެއްވި ޓްވީޓެއްގައި ވިދާޅުވިއެވެ.
މި ޓްވީޓް، ރީޓްވީޓް ކުރައްވަމުން ފައްޔާޒް ވިދާޅުވީ، ރައީސް ނަޝީދަށް ޝުކުރު ދަންނަވާ ކަމަށެވެ.
"ތިބޭފުޅާގެ އިރުޝާދާއި އެހީތެރިކަމާ އެކު އަޅުގަނޑުމެންގެ ޤައުމުގެ ޑިމޮކްރަސީ ވަރުގަދަކޮށް ތަރައްޤީ ކުރުމަށް ކުރާ މަސައްކަތުގައި ކުރިޔަށް ދާނަން" ފައްޔާޒް ވިދާޅުވިއެވެ.
ރައީސް ނަޝީދާއި ފައްޔާޒަކީ މީގެ ކުރިން އެތައް ކަމެއްގައި ދެބަސްވެފައިވާ ދެ ބޭފުޅުންކަން ފާހަގަ ކޮށްލެވެއެވެ. މިގޮތުން ރައީސް ނަޝީދު އިސްކޮށް ހުންނަވައި ފައްޔާޒް މަޤާމުން ދުރުކުރުގެ މަސައްކަތް މަޖިލިސް ތެރެއިން ކުރެވިގެން ދިޔައެވެ. އަދި ފައްޔާޒު އުޅުއްވަނީ، ރައީސް ޔާމީންގެ ވެރިކަމުގައި އަދީބު އުޅުއްވި ގޮތަށް ބްރޯ ހެދިގެން ކަމަށް ވެސް ރައީސް ނަޝީދު ތުހުމަތު ކުރެއްވިއެވެ. ފައްޔާޒް ވެސް ވަނީ ފަހަކަށް އައިސް ރައީސް ނަޝީދަށް އަމާޒުކޮށް ނުސީދާ ހަމަލާތަކެއް ދީފައެވެ. މިގޮތުން އެމްޑީޕީގެ ޤައުމީ ޖަލްސާއެއްގައި ރައީސް ނަޝީދަށް އަމާޒުކޮށް އަސްލު ބްރޯއަކީ ކާކުކަން އެންމެންނަށް އެނގޭނެ ކަމަށް ވިދާޅުވިއެވެ.
ޗެއަރޕާސަންގެ އިންތިޚާބަށް ފަހު އެމްޑީޕީ ބައިބައިވާނެ ކަމަށް ބައެއް ފަރާތްތަކުން ވާހަކަ ދެއްކި ނަމަވެސް، އިންތި ވެސް ވަނީ އިންތިޚާބުގެ ނަތީޖާ ޤާބޫލު ކުރައްވައި ޕާޓީއާ އެކު ދެމިހުންނަވާނެ ކަމަށް ވިދާޅުވެފައެވެ.
ކަލެއަކީ ރައީސުލްޖުމްހޫރިއްޔާތަ