އިސްރަށްވެހިންނަށް ހާއްސަ ޕޯސްޓްޕެއިޑް ޕެކޭޖެއް އުރީދޫން!
އުމުރުން ދުވަސްވީ މީހުންނަށް ހާއްސަ ކޮށްގެން "އިސްރަށްވެހި ޕްލޭން"ގެ ނަމުގައި 30 ޕަސެންޓްގެ ޑިސްކައުންޓާއި ހިލޭ ޑާޓާގައި ވައިބާ ބޭނުން ކުރެވޭނެ ޕޯސްޓް ޕެއިޑް ޕެކޭޖެއް އުރީދޫން މިއަދު ތައާރަފް ކޮށްފިއެވެ.
ދުނިޔޭގެ މުވާސަލަތާ ބެހޭ ދުވަހާ ގުޅުވައިގެން ތައާރަފްކުރި މި ޕެކޭޖުގެ ބޭނުމަކީ ދުވަހުގެ ޝިއާރުގައިވާ ގޮތަށް އިސްރަށްވެހިންނަށް ޓެކްނޮލޮޖީގެ ވަސީލަތްތައް ބޭނުން ކުރުމަށް ހިތްވަރު ދިނުމާއި ފާގަތި، ދުޅަހެޔޮ ދިރިއުޅުމެއް އެ މީހުންނަށް މަގުފަހިކޮށްދިނުންކަމަށް އުރީދޫން ވިދާޅުވެއެވެ.
މި ޚާއްޞަ ޕެކޭޖް އިފްތިތާޙްކޮށްދެއްވީ މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޢާއިޝަތު މުޙައްމަދު ދީދީ އެވެ. މި ޕެކޭޖް އިފްތިތާޙްކޮށްދެއްވަމުން މިނިސްޓަރ ވިދާޅުވީ "އުރީދޫގެ ސީނިއަރ ސިޓިޒަން ޕޯސްޓްޕެއިޑް" އޮފަރއާ އެކު އުމުރުން ދުވަސްވީ މީހުންނަށް ފަސޭހަކަމާ އެކު ޑިޖިޓަލް ދުނިޔޭގެ ބައިވެރިވުން އިތުރު ވެގެންދިއުމަށް މަގުފަހިވެގެންދާނެ ކަމަށެވެ.
މީގެ އިތުރުން ދިރިއުޅުމުގެ އަސާސީ ބޭނުމަކަށް އިންޓަރނެޓް ވެފައިވާއިރު، ވަރަށް ހަލުވިކަމާ އެކު ޓެކްނޮލޮޖީއަށް ބަރޯސާވެފައިވާކަން މިނިސްޓަރ ފާހަގަކުރެއްވިއެވެ. އެގޮތުން ޓެކްނޮލިޖީގެ ތެރެއިން ބަރޯސާވެފައި ވަނީ ހަމައެކަނި މުވާޞަލާތު ކުރުމަށް އެކަނިނޫން ކަމަށާއި، މަޢުލޫމާތު ހޯދައި، އިޤްތިޞާދު ކުރިއެރުވުމަށާއި، ރަނގަޅު ފެންވަރުގެ ޞިއްޙީ ޚިދްމަތް ތަކެއް ފޯރުކޮށްދިނުމަށް ވެސް ޓެކްނޮލޮޖީ މުހިންމު ރޯލެއް އަދާކުރާކަން މިނިސްޓަރ ފާހަގަކުރެއްވިއެވެ.
މި ޕެކޭޖާ ގުޅޭގޮތުން ވާހަކަދައްކަވަމުން އުރީދޫ މޯލްޑިވްސްގެ މެނޭޖިންގ ޑިރެކްޓަރ އަދި ސީއީއޯ ޚާލިދު އަލްޙަމާދީ ވިދާޅުވީ، ޑިޖިޓަލް ކުރިއެރުންތަކުގެ މަންފާގައި ހުރިހާ އުމުރެއްގެ މީހުން ޝާމިލުކޮށް ކަށަވަރު ކުރުމަކީ ވަރަށް މުހިންމު ކަމެއް ކަމަށާއި، އުއްމީދަކީ މިހާރަށް ވުރެ ބޮޑަށް ޑިޖިޓަލް ދުނިޔޭގައި އިސްރަށްވެހިންގެ ބައިވެރިވުން އިތުރުކުރުކޮށް، އައު ފުރުސަތުތަކާ ގުޅުވައިލަދިނުން ކަމަށެވެ. އަދި ޑިޖިޓަލް ޒަރިއްޔާތައް މެދުވެރިކޮށް، ދޮށީ އުމުރުގެ މުޖުތަމައުގެ ދިރިއުޅުން މުއްސަނދިކުރުމަށް ކުރަމުންދާ މަސައްކަތުގައި އުރީދޫއިން ދެމި ތިބޭނެކަމަށް ސީއީއޯ ޚާލިދު އަލް ޙަމާދީ ވިދާޅުވިއެވެ.
އުމުރުން ދުވަސްވީ މީހުންނަށް ހާއްސަކޮށްގެން އަލަށް ތައާރަފްކުރި ޕެކޭޖް ކަމަށްވާ "އިސްރަށްވެހިންގެ ޕެކޭޖް" މެދުވެރިކޮށް 60 އަހަރާއި މަތީގެ ކަސްޓަމަރުންނަށް ޕޯސްޓްޕެއިޑް މަހުފީއިން 30 ޕަސެންޓާ ހަމައަށް ޑިސްކައުންޓްގެ އިތުރުން އާއިލާއާއި ރައްޓެހިންނާއި ގުޅާލުމަށް ވައިބާ ބޭނުންކުރުމަށް ހިލޭ ޑޭޓާ ލިބިގެންދާނެ އެވެ. މީގެ އިތުރުން، މި ޕެކޭޖަށް ސަބްސްކްރައިބް ކުރައްވާ ހުރިހައި ކަސްޓަމަރުންނަށް ވެސް ކްލަބް ޕްރިމިއަރ ގޯލްޑް މެމްބަރޝިޕާ އެކު ރާއްޖެއާއި ރާއްޖެއިން ބޭރުގެ މަގުބޫލު ބްރޭންޑްތަކާއި ވިޔަފާރިތަކުން ހާއްސަ އޮފަރތައް ވެސް ލިބިގެންދާނެއެވެ.
