އެއްވެސް ކުޅިވަރު މުބާރާތެއް އަދި ޕްރެކްޓިސް ވެސް ބޭއްވުން މަނާ ކޮށްފި
ރާއްޖޭގައި އެއްވެސް ކުޅިވަރު މުބާރާތެއް އަދި ޕްރެކްޓިސް ވެސް ނުބާއްވަން އަންގައިފިއެވެ.
މާލެ ސަރަހައްދުން ކޮވިޑަށް ފައްސިވާ މީހުންގެ އަދަދު އިތުރުވެ އަތޮޅުތަކަށް ބަލި ފަތުރޭ މިންވަރުވެސް އިތުރުވަމުން އައުމާއެކު އަތޮޅުތެރެއަށް ބަލި ދިއުން ކޮންޓްރޯކުރުމަށާއި، މާލޭގައި ދިރިއުޅޭ މީހުންގެ ރައްކަލަށްޓަކައި ވަނީ އިތުރު ފިޔަވަޅުތަކެއް އެޅުމަށް ނިންމާފައެވެ.
އެގޮތުން މާލެ ސަރަހައްދުގައި އެއްވެސް ކުޅިވަރު މުބާރާތެއް އަދި ޕްރެކްޓިސް އެއްވެސް ބޭއްވުން ވަނީ މަނާކޮށްފައެވެ.
ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި މިނިސްޓްރީގެ ޕޮލިސީ ޕްލޭނިން އެންޑް އިންޓަނޭޝަނަލް ހެލްތު އާއިޝަތު ސާމިޔާ ވިދާޅުވީ މާލޭގައި ބައެއް ކުޅިވަރު މުބާރާތްތައް ބާއްވަމުން އަންނަ ކަން ފާހަގަ ކުރެވިފައިވާ ކަމަށެވެ.
ކުޅިވަރު މުބާރާތްތައް ކެންސަލް ކުރުމުގެ އިތުރުން ވެސް ކޮވިޑް19 ކޮންޓްރޯލް ކުރުމަށްޓަކައި މާލެ ސަރަހައްދުގައި ވަނީ ގިނަ ފިޔަވަޅުތަކެއް އަޅާފައެވެ. އެގޮތުން ރޭގަނޑު 10 އަކުން ފަތިހު 5 އަކަށް މާލެ ސަރަހައްދު ލޮކްޑައުން ކޮށް، މާލެ ސަރަހައްދުގައި 5 މީހުނަށް ވުރެ ގިނަ މީހުން އެއްވެ އުޅުން ވެސް ވަނީ މަނާކޮށްފައެވެ.
