ޚިޔާލު ފާޅުކުރުމުގެ ހައްގު ހަނިކުރާތީ އެމްނެސްޓީގެ ކަންބޮޑުވުން!
ރާއްޖޭގައި ހިޔާލު ފާޅުކުރުމުގެ ހައްގު ހަނިކުރާތީ އިންސާނީ ޙައްޤުތަކަށް މަސައްކަތްކުރާ ބައިނަލް އަޤްވާމީ ޖަމިއްޔާއެއް ކަމަށްވާ އެމްނެސްޓީ އިންޓަނޭޝަނަލްއިން ކަންބޮޑުވުން ފާޅުކޮށްފިއެވެ.
އެމްނެސްޓީން މިއަދު ކުރެއްވި ޓްވީޓެއްގައި ވިދާޅުވީ "އިންޑިއާ އައުޓް" ކެމްޕެއިންގެ ސަބަބުން ގައުމީ ސަލާމަތަށް ނުރައްކާވާ ފަދަ އަމަލުތައް ހިފެހެއްޓުމުގެ ނަމުގައި ރައީސްގެ ގަރާރަކުން ރާއްޖޭގައި މުޒާހަރާކުރުމުގެ ހައްގު ހަނިކުރުމަކީ ނުހަނު ކަންބޮޑުވާ ކަމެއް ކަމަށެވެ.
އެގޮތުން ސުލްހަވެރިކަމާ އެކު މުޒާހަރާ ކުރުމާއި، ހިޔާލުފާޅުކުރުމުގެ މިނިވަންކަމުގެ ހައްގު އެއްވެސް ވަރަކަށް ހަނިކުރާ ނަމަ އެކަން ކުރަނީ އެކަން ކުރަނީ ގާނޫނާ އެއްގޮތަށްތޯ ޔަގީން ކުރުމަށް ރާއްޖޭގެ ކަމާބެހޭ ފަރާތްތަކަށް އެމްނެސްޓީން ވަނީ ގޮވައިލައިފައެވެ.
މީގެ އިތުރުން އެމްނެސްޓީން ވަނީ މުޒާހަރާގެ ބައިވެރިންނާ ދެކޮޅަށް ބާރުގެ ބޭނުން ކުރުން ކުށްވެރިކޮށް އިންސާފުވެރިކަމާ އެކު އެކަން ތަޙްޤީޤް ކުރުމަށް ގޮވައިލައިފައެވެ.
އިންޑިއާ އައުޓް ހަރަކާތަކީ ގައުމީ ސަލާމަތަށް ހުރި ނުރައްކަލެއް ކަމަށް ކަނޑައަޅުއްވައި އެ ހަރަކާތް ހުއްޓުވުމަށް ރައީސް ޞާލިޙް ވަނީ ޤަރާރެއް ނެރުއްވައިފައެވެ. ނަމަވެސް އެއީ ޣައިރު ޤާނޫނީ ބަޔާނެއް ކަމަށާއި އެ ހަރަކާތް ނުހުއްޓުވޭނެ ކަމަށް އިދިކޮޅުން ވިދާޅުވެއެވެ.
އިދިކޮޅުން މިހާރު ސިލްސިލާކޮށް ބާއްވަމުން ގެންދާ "އިންޑިއާ އައުޓް" މުޒާހަރާގެ ތެރެއިން ރޭ ހަތް މީހަކު ވަނީ ހައްޔަރުކޮށްފައެވެ.
