އުރީދޫ ވޯލްޑް ކަޕް ފޯރި ރަސްމީކޮށް ފަށައިފި
ވޯލްޑް ކަޕުގެ ފޯރި އާއި ޖޯޝް ދިވެހިންގެ މެދުގައި އާލާކުރުވުމަށް އުރީދޫން ކުރިއަށް ގެންދާ ކެމްޕެއިން، "ވޯލްޑް ކަޕް ފޯރި" ރަސްމީކޮށް މިއަދު ލޯންޗުކޮށްފިއެވެ.
އުރީދޫގެ ކެމްޕެއިން ލޯންޗުކޮށްދެއްވީ ޔޫތު އެންޑް ސްޕޯޓްސް މިނިސްޓަރު އަހުމަދު މަހުލޫފެވެ. މި ކެމްޕެއިންގެ ފުރަތަމަ އިވެންޓެއްގެ ގޮތުން އުރީދޫ އާއި ހާޑްރޮކުގެ ސްޓާފުންގެ ރަހުމަތްތެރިކަމުގެ ފުޓްސަލް މެޗެއް ކުޅުނެވެ. މި މެޗު ފައްޓަވައި ދެއްވުމުގެ ގޮތުން މިނިސްޓަރު މަހުލޫފު ވަނީ ވޯލްޑް ކަޕުގެ ބޯޅަ، އަލް ރިހުލާގައި ކިކެއް ޖައްސަވައިފަ އެވެ.
މި އިވެންޓުގައި، ހަބޭސް ބޮޑުބެރާއި ރެޑްބުލް ފްރީ ސްޓައިލްގެ ޗެމްޕިއަން ސައިފުް ޒާހިރުގެ ހަރަކާތްތަކެއް ވަނީ ކުރިއަށް ގެންގޮސްފަ އެވެ. އުރީދޫން ބުނީ، މި ކެމްޕެއިންގެ ދަށުން އިތުރު ހަރަކާތްތަކެއް ކުރިއަށް ގެންދާނެ ކަމަށާއި އުރީދޫގެ ކަސްޓަމަރުންނަށް ހާއްސަ ޕްރޮމޯޝަންތަކެއް ފުޓުބޯޅަ ސީޒަނުގައި ކުރިއަށް ގެންދަން ވެސް ޕްލޭން ކޮށްފައިވާ ކަމަށެވެ.
އުރީދޫ ގްރޫޕަކީ މި ފަހަރުގެ ވޯލްޑް ކަޕުގެ އޮފިޝަލް މިޑްލް އީސްޓް އެންޑް އެފްރިކާ ޓެލެކޮމިޔުނިކޭޝަން އޮޕަރޭޓަރެވެ. މި ފަހަރުގެ ވޯލްޑްކަޕް ކުރިއަށް ދާނީ ނޮވެމްބަރު 21 އިން ޑިސެމްބަރު 18 އަށް ގަތަރުގައެވެ.
