ރާއްޖެ ލަންކާގެ ހާލަތަށް ދާނީ ދުނިޔެ ފުނޑުފުނޑުވެގެން: ފައްޔާޒް
މުޅި ދުނިޔެ ފުނޑުފުނޑުވެގެން ނޫނީ ރާއްޖެ ސްރީލަންކާ އޮތް ހާލަތަށް ނުދާނެކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.
ދައުލަތުގެ ދަރަނި އަދި ދަރަނި މެނޭޖްކުރުމަށް ކުރައްވަމުން ގެންދަވާ މަސައްކަތްތަކާ ގުޅޭގޮތުން، މަޝްވަރާ ކުރުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީއިން ވަނީ އިއްޔެ މިނިސްޓްރީ އޮފް ފިނޭންސް، މޯލްޑިވްސް މަނިޓަރީ އޮތޯރިޓީ އަދި މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ބޭފުޅުންނާ ބައްދަލުކުރައްވައިފައެވެ.
އިއްޔެ ބޭއްވި ކޮމިޓީގެ ބައްދަލުވުމެއްގައި ތިމަރަފުށީ ދާއިރާގެ މެމްބަރު އަބްދުﷲ ރިޔާޒް ކުރެއްވި ސުވާލަކަށް ޖަވާބު ދެއްވަމުން ފައްޔާޒު ވިދާޅުވީ އޭނާއަކީ ކޮންމެ ކަމެއްވެސް ވެދާނެ ކަމަށް ގަބޫލުކުރާ މީހެއް ކަމަށާއި ނަމަވެސް މަގާމުތަކުގައި ތިބޭއިރު ބަލަންޖެހޭނީ ފެންނަން ހުންނަ ހަގީގަތްތަކަށް ކަމަށެވެ.
"އަޅުގަނޑަކަށް ނުފެނޭ އެއްވެސް ހާލަތެއްގައި މުޅި ދުނިޔެ ފުނޑުފުނޑުވެގެން ނޫނިއްޔާ އަޅުގަނޑުމެންނެއް އެހައި ހިސާބަކަށް ދާނެ ތަނެއް. މިހާރު ދުނިޔޭގެ ކަންތައް އޮތް ގޮތުން އަޅުގަނޑުމެން އެކަހަލަ ހާލަތަކަށް ނުދާނެ" ފައްޔާޒު ވިދާޅުވީ އަދިވެސް ބޮޑެތި އެކިއެކި މަޝްރޫއުތަކަށް އިންވެސްޓު ކުރުމަށް ދަރަނި ނަގަން ޖެހޭ ކަމަށާއި ގައުމުގެ އިގްތިސާދީ ދުވެލި ހުރީ ރަނގަޅު މިސްރާބަށް ކަމަށެވެ. އަދި ލަންކާއަށް ދިމާވެފައި ވަނީ މުޅިން އެހެން ހާލަތެއް ކަމަށާއި މުޅި ދުނިޔެ ސުންނާފަތި ވެގެން ނޫނީ ރާއްޖެ އެ ހިސާބަށް ނުދާނެ ކަމަށް ވެސް މިނިސްޓަރ ވިދާޅުވިއެވެ.
"އަޅުގަނޑުމެން މިތިބީ ދަރަނި ނުދެއްކޭ ހާލަތުގައެއް ނޫން. ގޮންޖެހުން އެބަހުރި. އެކަމަށް އިންކާރެއް ނުކުރަން. ގައުމު ބަނގުރޫޓުވާ ކަމަށް ބުނެ ދައްކާ އަސާސެއް ނެތި ވާހަކަތަކުގެ ސަބަބުން އިންވެސްޓަރުން އިންވެސްޓު ކުރަން ފަހަތަށް ޖެހޭ."
ފައްޔާޒު ވިދާޅުވީ ގައުމުގެ ސްޓްރަކްޗާއަށް ރަނގަޅު ބަދަލުތަކެއް ގެންނަން ޖެހޭ ކަމަށާއި އެ ގޮތުން ރައްޔިތުންގެ ހުރިހައި ކަމެއް މިއަދު ކުރަމުން އަންނަނީ ސަބްސިޑައިޒް ކޮށްގެން ކަމަށްވާއިރު ކޮންމެވެސް ހިސާބަކުން އެކަމާ މެދު ވިސްނުންތަކެއް ވިސްނަން ޖެހޭ ކަމަށެވެ. އެގޮތުން ވަކި ބަޔަކަށް އަމާޒުކޮށްގެން ސަބްސިޑީ ދިނުން ފަދަ ކަންކަމަށް ފިނޭންސް މިނިސްޓްރީން ވަކާލާތު ކުރި ނަމަވެސް ރައްޔިތުންގެ މަޖިލީހުގެ ތެރެއިންނާއި އެހެން ގޮތްގޮތުން އަބަދުވެސް ފެންނަނީ އިތުރަށް ސަބްސިޑައިޒް ކުރުމުގެ ވާހަކަތައް ކަމަށް އޭނާ ވިދާޅުވިއެވެ.
Ads by STO
