ކަރަންޓް ޚަރަދު ކުޑަކުރަން ޕާކިސްތާނުގައި 9 ޖަހާއިރު ފިހާރަތައް ބަންދު ކުރަން އަންގައިފި
ޕާކިސްތާނަށް ދިމާވެފައިވާ ކަރަންޓްގެ މައްސަލަ އިތުރަށް ބޮޑުވިޔަ ނުދީ ހިފަހައްޓުމަށާއި އިޤްތިޞާދީ ގޮތުން ދަތި ދުވަސްވަރެއްގައި ބޭކާރު ޚަރަދު ވީހައި ވެސް ކުޑަ ކރުމަށް ރޭގަނޑު 9 ޖަހާއިރު، ފިހާރަތަކާއި ރެސްޓޯރެންޓް ފަދަ ތަންތަން ބަންދު ކުރަން ޕާކިސްތާނުގެ ވެރިރަށް އިސްލާމްއާބާދުގެ ސަރުކާރުން ނިންމައިފިއެވެ.
އިސްލާމްއާބާދުގެ ޑެޕިއުޓީ ކޮމިޝަނަރު އިރުފާން ނަވާޒް މިދިޔަ އާދީއްތަ ދުވަހުގެ ވަގުތެއްގައި ޓްވިޓާގައި ވިދާޅުވީ، މިފިޔަވަޅުތައް އަޅައިފައި ވަނީ ޚަރަދުތައް ވީހައި ވެސް ކުޑަކުރަން ކަމަށެވެ. އަދި ސަރުކާރުން މިގޮތަށް ކުރި އަމުރު ހިއްސާ ކުރެއްވިއެވެ.
އެ އަމުރުގައި ބުނެފައި ވަނީ ރޭގަނޑު 9 ޖަހާއިރު ހުރިހައި ފިހާރަތަކާއި ޝޮޕިން މޯލްތަކާއި ބޭކަރީތަކާއި ކޮންފެކްޝަނަރީތަކާއި އޮފީސްތަކާއި ސްޓޯރޫމްތަކާއި ގުދަންތަކާއި މާރުކޭޓްތައް ބަންދުކުރަން ޖެހޭ ކަމަށެވެ. މީގެ އިތުރުން ކައިވެނީގެ ހޯލްތަކާއި މައުރަޒު ބާއްވާ ހޯލްތައް ރޭގަނޑު 10:00އަށް ހުޅުވައިފައި ބެހެއްޓޭނެއެވެ.
އެ ގޮތަށް އަމަލުކުރަން ޖެހުނު ސަބަބުތައް ވެސް ތަފްސީލުކޮށްފައިވާ އެ އަމުރުގއި ބުނެފައި ވަނީ އެ އަމުރަށް "ވަގުތަށް އަމަލުކުރަން ފަށާނެ ކަމަށާއި ދެ މަސް ދުވަހަށް އެ އަމުރަށް ދެމިއޮންނާނެ" ކަމަށެވެ.
ޕާކިސްތާނަށް މިހާރު ކުރިމަތިވަމުންދާ ހޫނު މޫސުމުގެ ސަބަބުން ކަރަންޓަށް ވަނީ ޑިމާންޑް އިތުރުވެފައެވެ. ނަމަވެސް އިޤްތިޞާދީ ހާލަތާ އެކު އެ ވަރަށް ކަރަންޓް ފޯރުކޮށެއް ނުދެވެއެވެ.
