ސައުދީގެ ވަލީ އަޙްދު، ތުރުކީގެ ރައީސްއާ ބައްދަލު ކުރައްވައިފި
ސަޢޫދީ ޢަރަބިއްޔާގެ ވަލީއަޙުދު މުޙައްމަދު ބިން ސަލްމާން މިހާރު ތުރުކީވިލާތަށް ކުރައްވަމުން ގެންދަވާ ދަތުރުފުޅުގައި އެ ޤައުމުގެ ރައީސް ރަޖަބް ތައްޔިބް އުރުދުޣާނާ ބައްދަލުކުރައްވައިފިއެވެ.
މިއީ، އެމެރިކާގެ ވޮޝިންގްޓަން ޕޯސްޓުގެ ނޫސްވެރިއެއް ކަމުގައިވާ ޖަމާލް ޚާޝޮގީގެ މަރަށް ފަހު، ސަޢޫދީ ވަލީއަޙުދު ތުރުކީ ވިލާތަށް ކުރައްވާ ފުރަތަމަ ދަތުރުފުޅެވެ.
ޚާޝޮގީ މަރައިލައިފައި ވަނީ، ތުރުކީވިލާތުގައި ހުންނަ ސަޢޫދީގެ ކޮންސިއުލޭޓްގައި 2018ވަނަ އަހަރުގެ ތެރޭގައެވެ. އޭނާގެ މަރުގެ ފަހަތުގައި ސަޢޫދީ ވަލީއަޙުދު އަތެއް ވާކަމަށް ހުޅަނގުން ތުހުމަތު ކުރެއެވެ. ނަމަވެސް، މިއީ އޭނާ ދޮގު ކުރައްވާ ތުހުމަތެކެވެ.
ސަޢޫދީ ވަލީއަޙުދުގެ މި ދަތުރުފުޅުގެ މައިގަނޑު މަޤުޞަދަކީ، ޚާޝޮގީގެ މަރާ ގުޅިގެން ދެ ޤައުމުގެ ދެމެދުގައި ހީނަރުވެފައިވާ ގުޅުންތައް އަލުން ބަދަހި ކުރުމެވެ. އުރުދުޣާނާ އެކު ބޭއްވެވި ކުރެއްވި މަޝްވަރާތަކުގައި ވެސް އެންމެ ބޮޑަށް އަމާޒުކޮށްފައި ވަނީ މި ކަމަށެވެ. މި ގޮތުން، ޚާޝޮގީގެ މަރާ ގުޅިގެން ތުރުކީވިލާތުގައި ހިންގަމުންދާ ޝަރީއަތް ނިމުމަކަށް ގެނައުމަށް ސަޢޫދީ ވަލީއަޙުދު ދަނީ އެ ޤައުމަށް ބާރު އަޅުއްވަމުންނެވެ.
މި ދަތުރުފުޅުގައި ސަޢޫދީ ވަލީއަޙުދު ވަނީ ތުރުކީ ވިލާތުގެ ކެބިނެޓާ ވެސް ބައްދަލު ކުރައްވައިފައެވެ. އަދި، ބޭއްވެވި މަޝްވަރާތަކަށް ފަހު، ދެ ޤައުމުގެ ގުޅުމަށް ރަނގަޅު ބަދަލުތަކެއް އައިސްފައިވާކަމަށް ތުރުކީ ވިލާތުން ބުނެއެވެ. މި ގޮތުން، ވިޔަފާރިއަށް އޮތް ހުރަސްތައް ނައްތައިލުމާއި، ދެ ޤައުމުގެ ދެމެދުގައި ވައިގެ ދަތުރުތައް އަލުން ފެށުމަށް ވެސް އެއްބަސްވެފައިވާ ކަމަށް ތުރުކީ ވިލާތުން ބުނެއެވެ.
މީގެ އިތުރުން، ހަކަތައާއި، އިޤްތިޞާދާއި، ސަލާމަތީ ދާއިރާތަކުން ގުޅުން ބަދަހިކުރުމަށް ދެ ޤައުމުގެ ދެމެދުގައި އެއްބަސްވުންތަކެއްގައި ސޮއި ކުރާނެކަމަށް ވެސް ބެލެވެއެވެ. ސަޢޫދީ ވަލީއަޙުދު ތުރުކީ ވިލާތަށް ވަޑައިގަންނަވައިފައި މި ވަނީ، އިޤްތިޞާދީ ގޮތުން ތުރުކީ ވިލާތަށް ކުރިމަތިވެފައިވާ ދަތިކަމުން އަރައިގަތުމަށް އެ ޤައުމުން މާލީ އެހީތެރިކަން ހޯދަން މަސައްކަތް ކުރަމުންދާ ދަނޑިވަޅެއްގައެވެ.
Ads by STO
