ޝައިޚް ނިޝާންގެ ބަންދަށް 7ދުވަސް، މުޙައްމަދު އިސްމާއީލުގެ ބަންދަށް 5 ދުވަސް
ބައިނަލްއަޤްވާމީ ޔޯގާ ދުވަސް ފާހަގަކުރުމަށް ބޭއްވި ހަރަކާތަށް ހުރަސްއަޅައި ހަމަނުޖެހުން ހިންގިކަމުގެ ތުހުމަތުގައި ހައްޔަރުކުރި މީހުންގެ ބަންދަށް މުއްދަތު އިތުރުކޮށްފިއެވެ.
މި މައްސަލައިގައި ހައްޔަރުކުރި މީހުންގެ ތެރެއިން ބަންދުގައި ބެއިތިއްބުމަށް މުއްދަތު ޖަހައިފައި ވަނީ ޝައިޚް އާދަމް ނިޝާންއާއި، ކުރީގެ މަޖިލިސް މެންބަރު އަދި ޕީޕީއެމްގެ ހަރަކާތު ކޮމިޓީ ޗެއަރ މުޙައްމަދު އިސްމާޢީލްގެ އިތުރުން ޕީޕީއެމްގެ އެކްޓިވިސްޓް މުހައްމަދު ރައްޒާންގެ ބަންދަށެވެ.
އެގޮތުން ކުރީގެ މެމްބަރު މުހައްމަދު އިސްމާޢީލާއި ޕީޕީއެމްގެ އެކްޓިވިސްޓް މުހައްމަދު ރައްޒާންގެ ބަންދަށް ފަސް ދުވަސް ޖަހައިފައިވާ އިރު ޝައިޚް އާދަމް ނިޝާންގެ ބަންދަށް ކްރިމިނަލް ކޯޓުން ހަތް ދުވަސް ވަނީ ޖަހައިފައެވެ. މީގެ އިތުރުން ރޭ ވަނީ ޝައިޚް ފަޟްލޫން ބިން މުޙައްމަދު ވެސް ހައްޔަރުކޮށްފައެވެ. އޭނާ ވެސް ކްރިމިނަލް ކޯޓަށް ހާޒިރުކޮށްފައިވާ އިރު އަދި ބަންދާ މެދު ގޮތެއް ނުނިންމައެވެ.
ހައްޔަރުކުރި މީހުންގެ މައްޗަށް ކޮށްފައިވާ ތުހުމަތަކީ، މާރާމާރީ ހިންގައި، އެ ތަނުގައި ހުރި ތަކެއްޗަށް ގެއްލުންދީ، އާންމުންގެ ހިތްތަކުގައި ބިރުވެރިކަން އުފެދޭ ގޮތަށް ހަމަނުޖެހުން ހިންގައި، ފުލުހުންނާ ކުރިމަތިލައި، ފުލުހުންގެ ދައުރު އަދާކުރުމަށް ހުރަސް އަޅައިފައިވާކަމުގެ ތުހުމަތެވެ. މިގޮތުން ހަރަކާތްތެރިވި ފުލުހުންގެ ބަހާއި، ސީސީޓީވީ ފުޓޭޖުގެ އިތުރުން އިންޓެލިޖެންސް ރިޕޯޓު ވަނީ ހެކީގެ ގޮތުގައި އެ މީހުންނާ ދެކޮޅަށް ވަނީ ހުށަހަޅައިފައެވެ.
ޔޯގާ ދުވަސް ފާހަގަކުރިޔަ ނުދިނުމަށް ޓަކައި ގަލޮޅު ދަނޑުގައި ހަމަނުޖެހުން ހިންގި ކަމުގެ ތުހުމަތުގައި މީގެ ކުރިން ވަނީ ހަ މީހަކު ހައްޔަރުކޮށްފައެވެ. އޭގެ ތެރެއިން ހަތަރު މީހެއްގެ ބަންދަށް ދެ މަސް ދުވަސް އިތުރުކޮށްފައިވާ އިރު ދެ މީހެއްގެ ބަންދަށް ވަނީ ފަސް ދުވަސް އިތުރުކޮށްދީފައެވެ.
ހިންދޫ ދީން ފަތުރަން އިންޑިޔާއިން އދ ހުށަހަޅައިގެން ޔޯގާ ފާސްކުރިޔަސް ދިވެހިން ނުޖެހޭ އެޔަކަށް ތަބާވެ ޝިރުކުގެ އެ ޢަމަލުގައި ބައިވެރިވާން، ޔޯގާ ވައްތަރީ ކަސްރަތަކަށް ވުރެން ބޮޑަށް ހިންދީ ދީނުގެ އަޅުކަމަކާއި، ތީގައި އެމީހުންގެ ކަލާގެ ސިފަވާ ގޮތަށްވެސް އިންނަންޖެހޭ ” ކަސްރަތަކަށްވާނީ އެކްސަސައިޒު ލިބޭ ކަސްރަތު، ޔޯގާގައި އިންނަ ތަނުގައި ހުރެ ކުރާ ހަރަކާތެއްކުރަނީ އެޔަކުން ހަށިގަޑަކަށް މާކަބޮޑު ކަސްރަތެއް ނުލިބޭނެ !