ސިޔާސީ މީހަކަސް، ދީނީ އިލްމުވެރިޔަކަސް ހަރުކަށި ފިކުރަށް ޖާގަ ދެވިގެން ނުވާނެ: އަސްލަމް

މުޖުތަމައެއްގައި ހަރުކަށި ފިކުރަށް ޖާގަ ދެވިގެން ނުވާނެ ކަމަށް އެމްޑީޕީގެ ޕާލަމެންޓްރީ ގްރޫޕްގެ ލީޑަރު، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ.

Ads by STELCO

އަސްލަމް މިހެން ވިދާޅުވެފައި ވަނީ ބައިނަލް އަޤްވާމީ ޔޯގާ ދުވަހާ ގުޅިގެން ހިންގި ހަރަކާތްތަކަށް ހުރަސް އަޅައި ހަމަނުޖެހުން ހިންގައިފައިވާ ދަނޑިވަޅެއްގައެވެ.

ހައްދުފަހަނަ އެޅި ހަރުކަށި ފިކުރަކީ މުޖުތަމައުގައި އެއްވެސް ގޮތަކަށް ބަލައިގަނެވޭނެ ކަމެއް ނޫން ކަމަށާއި މިފަދަ އަމަލުތައް ހިންގަނީ، ކުށްކުރާ މީހަކަށް ވިޔަސް، ދީނީ އިލްމުވެރިއެއް ކަމަށްވިޔަސް ސިޔާސީ މީހެއް ކަމަށްވިޔަސް އިންސާފުގެ ކުރިމައްޗަށް ގެންނަން ޖެހޭ ކަމަށެވެ.

އަސްލަމްގެ ޓްވީޓްގައި ފުލުހުންނާއި ހޯމް މިނިސްޓްރާއި ޑިފެންސް މިނިސްޓަރާއި ރައީސް އޮފީހުގެ ހޭންޑަލް ޓެގް ކުރައްވައިފައިވެއެވެ.

ޔޯގާ ހަމަނުޖެހުމާ ގުޅިގެން މިހައިތަނަށް 14 މީހަކު ހައްޔަރުކޮށްފައިވާއިރު އޭގެތެރޭގައި ދެ އިލްމުވެރިއަކު ވެސް ހިމެނެއެވެ. އެއީ ޝައިހު އާދަމް ނިޝާންއާއި ޝައިހް ފަޒްލޫން މުހައްމަދެވެ.