ކާފިއު ވަގުތުގައި ވެސް ފަތިސް ނަމާދަށް ދެވޭނެ: އެޗްޕީއޭ
ރޭގަނޑު 10 ކުން 5 އަށް ބޭރުގައި އުޅުން މަނާކުރި ނަމަވެސް ފަތިސް ނަމާދަށް މިސްކިތަށްދާ މީހުން އިސްތިސްނާ ވާނެ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.
ކޮވިޑް-19 އަށް ފައްސިވާ މީހުންގެ އަދަދު އިތުރުވަމުންދާތީ އެޗްޕީއޭ އިން ވަނީ މިއަދު ފެށިގެން ކޮންމެ ރެއަކު 10 އިން ފެށިގެން ފަތިހު 5 އާއި ހަމައަށް ކާފިއު ހިންގުމަށް ނިންމާފައެވެ. އެ ވަގުތުގައި މީހުން މަގުމައްޗަށް ނިކުމެ އުޅުމަކީ މަނާ ކަމެކެވެ.
އެޗްޕީއޭ އިން ބުނީ އެ ވަގުތުގައި އަޅާފައިވާ ފިޔަވަޅުތަކުން ފަތިސް ނަމާދަށް މިސްކިތަށްދާ ފަރާތްތަށް އިސްތިސްނާވާނެ ކަމަށެވެ.
މީގެއިތުރުން މި ފިޔަވަޅުތަކުން ސިފައިންނާއި ފުލުހުންނާއި، ސިއްހީ ހިދުމަތްދޭ އިދާރާތަކުގެ މުވައްޒަފުންނާއި އެ މުވައްޒަފުން ދުއްވާ އުޅަނދު ފަހަރާއި، އެޗްއީއޯސީގެ ފާސް ލިބިފައިވާ ފަރާތްތައް ވެސް އިސްތިސްނާ ވާނެ ކަމަށް އެޗްޕީއޭ އިން ބުނެއެވެ.
