ރައީސް ނަޝީދުގެ ތުހުމަތެއް: ފުލުހުންގެ ބްލެކްމެއިލް ރިންގުން 43 މީހެއްގެ ފޮޓޯ ނެގި

ފުލުހުންގެ ތެރޭގައި ބްލެކްމެއިލް ރިންގެއް ހިންގާ ކަމަށާއި އެ ރިންގުން 43 މީހެއްގެ ފޮޓޯއާއި ވީޑިއޯ ނަގައި ބްލެކްމެއިލް ކުރަމުންދާ ކަމަށް ރައްޔިތުންގެ މަޖިލިހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

Ads by STELCO

އެމްޑީޕީގެ ރަސްމީ ގްރޫޕެއްގައި ނަޝީދު މިއަދު ވިދާޅުވީ ފުލުހުންގެ ތެރޭގައި ބްލެއިކް މެއިލް ރިންގެއް ހިންގާތާ ދެ އަހަރުވެއްޖެ ކަމަށާއި ސަރުކާރު ވެސް ހިނގަނީ ބްލެކްމެއިލްކޮށްގެން ނޫނީ ލާރިދީ ގަނެގެން ކަމަށެވެ.

"43 މީހުންގެ ފޮޓޯ ނަގައިފައި އެބަހުރި. މިއީ ސަރުކާރު ހިނގާ ގޮތަކީ،" ނަޝީދު ވިދާލުވިއެވެ.

މީގެ ކުރިން ނަޝީދުގެ ކޮއްކޮ، ނާޒިމް ސައްތާރަށް ތުހުމަތުވާ އެއް ޖިންސުން ގުޅުން ހިންގާ ވީޑިއޯއެއް އާއްމުވުމުން ފުލުހުން ވިދާޅުވީ އެ ވީޑިއޯގެ މައްސަލައާއި އެފަދަ ވީޑިއޯތަކެއް ބޭނުންކޮށްގެން ގިނަ ބަޔަކު ބްލެކްމެއިލް ކުރާ މައްސަލަ ތަހުގީގުކުރަމުން އަންނަ ކަމަށެވެ.

އޭގެ ފަހުން ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެމްބަރު ހުސެއިން ޝަހީމް (އަނދުން ހުސެއިން) އަންހެނަކާއި ފިރިހެނަކާ އެކު އޮއްވައި ފެންނަ ބަރަހަނާ ފޮޓޯއެއް ވަނީ ލީކުކޮށްލައިފައެވެ.

ރައްޔިތުންގެ މަޖިލީހުގެ ބައެއް މެމްބަރުން ހިމެނޭހެން ގިނަ ބައެއްގެ ބަރަހަނާ ފޮޓޯތަކާއި ވީޑިއޯތައް ލީކު ކުރުމުގައި އިސްކޮށް ހަރަކާތްތެރިވަނީ ފުލުހުންކަން ނަޝީދު އިއްޔެ ވެސް ތުހުމަތު ކުރެއްވިއެވެ.

އެމްޑީޕީގެ ގައުމީ މަޖިލީސް ގްރޫޕުގައި ނަޝީދު ވިދާޅުވީ، ފުލުހުންނާ ގުޅިގެން ގިނަ ބައެއްގެ ފޮޓޯ ނަގައިފައިވާ ކަމަށާއި އަދި އެ ފޮޓޯތައް ވެސް އާންމުންނަށް ފެންނާނެ ކަމަށެވެ. އަދި ފުލުހުންގެ އިދާރާ އިސްލާޙް ނުކުރެވުނު ކަމަށް ވިދާޅުވިއެވެ.