ޔޯގާ ހަރަކާތާ ގުޅިގެން ހައްޔަރުކުރި މީހުން މިނިވަންކުރަން ގޮވާލައި އެއްވުމެއް ބާއްވަނީ

ހިންދޫ ދީނުގެ އަޅުކަމެއްކަމަށްވާ ޔޯގާ ހެދުމުގެ ހަރަކާތް ކުރިއަށް ގެންދަނިކޮށް އެ ހަރަކާތަށް ހުރަސް އަޅައިގެން ހައްޔަރުކުރި މީހުން މިނިވަންކުރަން ގޮވާލައި އިހުތިޖާޖު ކުރުމަށް އިދިކޮޅު ކޯލިޝަނުން ނިންމައިފިއެވެ.

Ads by Sosun Fihaara

އިދިކޮޅު ކޯލިޝަނުން އިއްޔެ ހާމަކުރި ގޮތުގައި އިހުތިޖާޖު ކުރިއަށްދާނީ މިރޭ 20:30 އިން ފެށިގެން ޕީޕީއެމް އޮފީސް ކުރިމަތިންނެވެ.

މީގެ ދުވަސްކޮޅެއް ކުރިން މާލޭ ގަލޮޅު ދަނޑުގައި ބޭއްވި ޔޯގާ ހެދުމުގެ ހަރަކާތާ ގުޅިގެން ޖުމްލަ 21 މީހުން ހައްޔަރުކޮށްފައިވެއެވެ.

ހައްޔަރުކުރި މީހުންގެ ތެރޭގައި ދީނީ ޢިލްމުވެރިންނާ އާންމުން ވެސް ހިމެނެއެވެ.

އޭގެެތެރޭގައި އައްޝައިޚް އާދަމް ނިޝާނާއި, އައްޝައިޚް ފަޟްލޫން މުޙައްމަދާއި, މަޖިލީހުގެ ހޯރަފުށީ ދާއިރާގެ ކުރީގެ މެންބަރު މުޙައްމަދު އިސްމާޢީލް ވެސް ހިމެނެއެވެ. އެ މީހުން އަދިވެސް ތިބީ ބަންދުގައެވެ.