ސްޓެލްކޯއިން ވިލިމާލޭގައި ބޯހިޔާވެހިކަމުގެ މަޝްރޫއެއް
ސްޓެލްކޯގެ މުވައްޒަފުންނަށް އަމާޒުކޮށްގެން ވިލިމާލޭގައި ބޯހިޔާވަހިކަމުގެ އިތުރު މަޝްރޫއެއް ފެށުމަށް ސްޓެލްކޯ އިން ނިންމައިފިއެވެ.
ތާޖުއްދީން ސްކޫލް ހޯލުގައި ސްޓެލްކޯގެ މުވައްޒަފުންނަށް ހާއްސަކޮށްގެން ރޭ ބޭއްވި ބައްދަލުވުމުގައި މިކަން ހާމަކޮށްފައިވަނީ އެ ކުންފުނީގެ މެނޭޖިން ޑިރެކްޓަރު އަހުމަދު ޝަރީފެވެ.
ޝަރީފް ވިދާޅުވީ، ސްޓެލްކޯގެ އާ ހައުސިން މަޝްރޫއަށް އެ ކުންފުނީގެ ބޯޑުގެ ހުއްދަ ހޯދުމުގެ މަސައްކަތް ކުރަމުން އަންނަ ކަމަށެވެ.
ވިލިމާލޭގައި މަޝްރޫއު ކުރިޔަށް ގެންދަން ނިންމި ސަބަބު ހާމަކުރަމުން ޝަރީފް ވިދާޅުވީ، ސަރުކާރުން މާލެ އާއި ވިލިމާލެ ގުޅައިލުމަށް އަޅާ ބްރިޖާ އެެކު ދަތުރުފަތުރުކުރުމަށް މާބޮޑު ހުރަސްތަކެއް ނޯންނާނެ ކަމަށެވެ. އަދި ވިލިމާލޭއަކީ ހިތްފަސޭހަ ރަށެއް ކަމަށް ސިފަ ކުރެއްވިއެވެ.
ބޯހިޔާވަހިކަމުގެ އާ މަޝްރޫއެއް ސްޓެލްކޯ އިން އިއުލާނުކުރިއިރު، އެ ކުންފުނިން ހުޅުމާލޭ ފޭސް 2 ގައި އަޅާފައިވާ ފްލެޓްތަކަށް އަންނަ މަހު ހަ ވަނަ ދުވަހު މީހުން ވަދެވޭވަރު ވާނެ ކަމަށް ޝަރީފްވަނީ ޔަޤީންކަން ދެއްވާފައެވެ.
