އީދު ބަންދު ތެރޭ ބަންގްލަދޭޝްގައި 300 އެކްސިޑެންޓް، 400 މީހުން މަރުވި
މި އަހަރު އަލްހާ އީދު ތެރޭގައި ބަންގްލަދޭޝްގައި ގިނަ އަދަދެއްގެ އެކްސިޑެންޓްތަކެއް ހިނގާ ގިނަ ބަޔަކު މަރުވެއްޖެއެވެ.
ބަންގްލަދޭޝް ޕެސެންޖަރ ވެލްފެއާ އެއޯސިއޭޝަނުން އާއްމު ކުރި ޑޭޓާތަކުން ދައްކާ ގޮތުގައި، މިއީ އެ ޤައުމުގައި އެއްގަމު ދަތުރުފަތުރުގެ އެކްސިޑެންޓްތައް އެންމެ ގިނައިން ހިނގި ދުވަސްވަރެވެ. 2016 ވަނަ އަހަރުން ފެށިގެން އެ އިދާރާއިން ގެންދަނީ އެ ޤައުމުގައި ހިނގާ އެކްސިޑެންޓްތައް ރިކޯޑް ކުރަމުންނެވެ.
އެ އިދާރާއިން ބުނެފައިވަނީ މިދިޔަ އީދު ބަންދާ ދިމާކޮށް ގިނަ ބަޔަކު ވެރިރަށް ޑާކާއިން އަމިއްލަ ވިލެޖަށް ދަތުރުކޮށްފައިވާ ކަމަށެވެ. އަދި މިގޮތަށް ގިނަ ދަތުރުތަކެއް ކުރަން ޖެހުމުން ގިނަ އެކްސިޑެންޓްތަކެއް ވެފައިވާ ކަމަށެވެ. ޖުމްލަ 302 އެކްސިޑެންޓްގައި 403 މީހުން މަރުވެފައިވާ ކަމަށް ރިކޯޑް ކުރެވުނު ނަމަވެސް މިއަދަދު އިތުރުވާނެ ކަމަށް އެ އިދާރާއިން ހާމަކުރެއެވެ. އަދި އެކްސިޑެންޓް ތަކުގައި 774 މީހަކަށް އެކިވަރުގެ އަނިޔާވަނީ ލިބިފައެވެ.
ބަންގްލަދޭޝަކީ ދުނިޔޭގައި އެންމެ ގިނަ އެކްސިޑެންޓްވާ ޤައުމުކަން ފާހަގަކޮށްލަން ޖެހެއެވެ.
މިދިޔަ އަހަރު އީދާ ދިމާކޮށް ވެސް އެ ޤައުމުގައި 258 އެކްސިޑެންޓްވަނީވެފައެވެ. އަދި އެކްސިޑެންޓްތަކުގައި 376 މީހަކު ވަނީ މަރުވެފައެވެ.
އެކްސިޑެންޓްތައް އާއްމުކޮށް ހިނގަނީ ސައިކަލުގައި ކަމުން، އީދު ބަންދާ ދިމާކޮށް ހައިވޭގައި ސައިކަލު ދުއްވުންވަނީ މަނާކޮށްފައެވެ. ނަމަވެސް ގިނަ ބަޔަކުވަނީ އަމުރާ ޚިލާފުވެފައެވެ. މި އަހަރު ހިނގި އެކްސިޑެންޓްތަކުގެ 30 އިންސައްތައަކީ ސައިކަލުން ހިނގި އެކްސިޑެންޓްތަކެވެ.
