ރައީސް އޮފީހުގެ ކޮމިއުނިކޭޝަންސް ޑިޕާޓުމެންޓުގެ ހެޑް އަކަށް ހިސްކޮށް
ރައީސުލްޖުމްހޫރިއްޔާގެ އޮފީހުގެ ކޮމިއުނިކޭޝަންސް އޮފީސް ހިންގުން މުހައްމަދު ހިސާން އަލީ ފަހްމީ (ހިސްކޮ) އާ ހަވާލުކޮށްފިއެވެ.
ރައީސް އޮފީހުގެ ކޮމިއުނިކޭޝަން ޑިޕާޓްމެންޓްގެ އިސްވެރިއެއްގެ ގޮތުގައި ހުންނެވި އިބްރާހިމް ހޫދު ވިދާޅުވީ ކޮމިއުނިކޭޝަންސް ޑިޕާޓްމަންޓްގެ ވެރިއެއްގެ ގޮތުގައި މިއަދުން ފެށިގެން މަސައްކަތް ކުރާނީ ހިސާން ކަމަށެވެ.
ހިސާންއަކީ ރައީސް އޮފީހުގައި އަންޑަރ ސެކްރެޓެރީގެ މަގާމުގައި ހުންނެވި ބޭފުޅެކެވެ. އަދި ހޫދަކީ ރައީސް އޮފީހުގެ ފޮރިން ރިލޭޝަން ޑިޕާޓްމަންގެ އިސްވެރިޔާއެވެ.
ރައީސް އޮފީހުގެ ސްޕޯކްސްޕާސަންގެ މަގާމުވެސް މީގެކުރިން ހުދު އަދާކުރައްވާފައިވެއެވެ. އެ މަގާމުގައި މިހާރު ހުންނެވީ މުހައްމަދު މަބްރޫކް އަޒީޒެވެ.
ޙިސާނަކީ ކުރިން ދިރާގުގައި މަސައްކަތްކުރެއްވި ބޭފުޅެކެވެ. އޭނާ މާކެޓިން އެންޑް އިންޓަނޭޝަނަލް ބިޒްނަސްގެ ދާއިރާއިން ތައުލީމު ހާސިލުކުރެއްވީ އޮސްޓްރޭލިއާގެ ވިކްޓޯރިއާ ޔުނިވާސިޓީންނެވެ. ރައީސް އޮފީހުގެ ވަޒީފާއާ ގުޅިވަޑައިގަތީ 2019 ވަނަ އަހަރުއެވެ.
