ބެއިރޫތުގެ ގޮވުން: ބާރުގަދަ ގޮވުމުގެ މަންޒަރު ކައިވެނީގެ ފޮޓޯޝޫޓު ވީޑިއޯއެއްގެ ތެރެއިން!
ލުބްނާންގެ ވެރިރަށް ބެއިރޫތުގައި މިދިޔަ އަންގާރަ ދުވަހުގެ ވަގުތެއްގައި ބާރުގަދަ ގޮވުމެއް ގޮވާފައިވާއިރު، އެމަންޒަރު މިވަނީ އިއްތިފާގަކުން އެހެން ކެމެރާއަކަށްވެސް އަރާފައެވެ.
ކެމެރާމަން މަޙްމޫދް ނާކިބް އެވަގުތު ދިޔައީ އެދުވަހު އަލަތު ކައިވެނިކުރި އިސްރާ ސެބްލާނީ ގެ ފޮޓޯޝޫޓެއް ނަގަމުންނެވެ.
ވަރަށް ނަލަ ހެދިލައިގެން ހުދުކުލައިގެ ލޭސް ވެޑިންޑް ޑްރެސްއެއް ލައިގެން ހުރި އިސްރާގެ ވީޑިއޯއެއް ނަގަމުން ދަނިކޮށް ކުއްލިއަކަށް ބާރު އަޑުފަށްގަނޑެއްގޮވާ، މުޅިތަން ދިޔައީ ގުޑައިގެންނެވެ. އަދި އިމާރާތްތަކުން ގައުތަކާއި ބިއްލޫރިތައް ވެއްޓި އިސާހިތަކު މުޅި ތަންް ދުމަށް ވެގެން ދިޔައެވެ.
ބާރުގަދަ އެއްޗެއް ގޮވުމުގެ ސަބަބުން އިސްރާ އަށްވެސް ލިބުނު ކުއްލި ސިހުމާއެކު އޭނާވެސް ދިޔައީ ބުރައިގެންނެވެ. އެވަގުތު އިސްރާ އަށް އެހީތެރިވެ ސަލާމަތް ކުރުމަށް އޭނަގެ ފިރިމީހާ އަވަހަށް އެތަނަށް ގޮސް، އިސްރާ ގޮވައިގެން އެސަރަހައްދުން ދުރަށް ދެއެވެ.
ބެއިރޫތުގައި ބާރުގަދަ އެއްޗެއް ގޮވުމުގެ ސަބަބުން ގާތްގަނޑަކަށް 100 އެއްހާ މީހުން މަރުވެ، 4000 އަށްވުރެ ގިނަ މީހުން ވަނީ ޒަޚަމްވެފައެވެ.
ލުބްނާންގެ ބެއިރޫތު ކުރިން ސިފަވެފައިވަނީ މެދުއިރުމަތީގެ "ޕެރިސް" ގެ ގޮތުގައެވެ. ނަމަވެސް ގޮވި ގޮވުމުގެ ސަބަބުން އެސިޓީއަށް މިހާރުވަނީ މާޔޫސްކަން ވެރިވެފައެވެ.
ބެެއިރޫތުގައި ހިނގި މިހާދިސާގައި 2،750 ޓަނު އެމޯނިއަމް ނައިޓްރޭޓް ގޮވާފައިވާ ކަމަށް ރިޕޯޓުތަކުން ބުނެއެވެ.
Ads by STO
