އެމްޑީޕީއަށް ބައި އިލެކްޝަންތައް ކާމިޔާބުވީ ނުފޫޒު ފޯރުވައިގެން: ޝުޖާއު
އިއްޔެ ބޭއްވި ދެ ބައި އިލެކްޝަން އެމްޑީޕީއަށް ކާމިޔާބުވީ ނުފޫޒު ފޯރުވައިގެންކަމަށް ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވެއްޖެއެވެ.
މ.ދިއްގަރު ކައުންސިލަށް މެންބަރަކު އިންތިޚާބުކުރުމަށާއި, ތ.ގާދިއްފުށީ ކައުންސިލަށް އަންހެން މެންބަރަކު އިންތިޚާބުކުރުމަށް އިއްޔެ ބޭއްވި ބައި އިލެކްޝަންތައް އެމްޑީޕީއަށް ކާމިޔާބުކުރެވުނީ ކުޑަކުޑަ ތަފާތަކުންނެވެ.
އިންތިޚާބު ކާމިޔާބުވުމުން ޔޫތު މިނިސްޓަރު އަޙްމަދު މަހްލޫފް ވިދާޅުވީ ލާދީނީއަށް ގޮވައި, ފާހިޝް ކަންކަން ފަތުރާ ބަޔަކަށް ހަދައި އަދި ތަފާތު ގިނަ އިލްޒާމުތައް އެބައިމީހުން ގެންދަނީ އަޅުވަމުން ކަމަށާއި, އެއީ ސިޔާސީ ބޭނުމުގައި ދައްކާ ވާހަކަކަން ރައްޔިތުންނަށް މިއަދު ސާފުކަމަށެވެ. އަދި ރައީސް ޞާލިޙްގެ އިންގިލާބީ ތަރައްގީ ރައްޔިތުން ބަލައިގެންފިކަމަށް ވެސް އޭނާ ވިދާޅުވިއެވެ.
މަހްލޫފަށް ރައްދު ދެއްވައި ޝުޖާއު ވިދާޅުވީ ތިއީ ލާދީނީ ކަންކަމަށް ހިތްވަރުދޭ ޕާޓީއެއް ކަން ރައްޔިތުންގެ ކުރިމަތީ ދަނީ ފެންނަމުން ކަމަށެވެ. އަދި ލަދެއް ހަޔާތެއް ނެތް ބައެއްގެ ކުރިމަތީ ކިތަންމެ ބޮޑު ފާހިޝް އަމަލަކީ މާ ބޮޑުކަމަކަށް ވާނެތޯ ވެސް ޝުޖާއު ސުވާލު ކުރެއްވިއެވެ.
''އިންތިޚާބަށް 2 ދުވަސްތެރޭ 15 ސިޔާސީ ވަޒީފާ އުފައްދައި، އިންތިޚާބަށް ނުފޫޒު ފޯރުވައިގެން ވެސް ދިއްގަރުން ފަރަގު ކުރަން ބޭނުންވި 150 ވޯޓް ފަރަގު ކުރެވުނުބާ. ގާދިއްފުށި ލިބުނީ ހަމަ ކިރިޔާ.''
ޝުޖާއު ވިދާޅުވީ އިންތިޚާބުގެ ނަތީޖާއިން މޮޅުވި ނަމަވެސް, މާޒީއަށް ބަލާއިރު ލާދީނީ ކަމާއި، ފާހިޝް އަމަލުތަކަށް އެމްޑީޕީން ދިން ތަރުހީބުން ރައްޔިތުންގެ ތާއީދު ދިޔައީ ދަށަށް ކަމަށެވެ.
