މަގުމަތީ ކޯޓު އުފަންވަނީ ކުށްވެރިންނަށް އަދަބު ނުދީ ވަލު ދޮރޯށިން ނެރޭތީ: އިޔާޟް

އަމިއްލައަށް މަގުމަތީ ޙުކުމްކޮށް, ތަންފީޒުކުރާ ހިސާބަށް ދަނީ ކުށްވެރިންނަށް ޙައްޤު އަދަބު ނުދީ ވަލު ދޮރޯށިން ނެރޭތީކަމަށް ޑރ.މުޙައްމަދު އިޔާޟް ޢަބްދުއްލަޠީފް ވިދާޅުވެއްޖެއެވެ.

Ads by MWSC

އިޔާޟް މިހެން ވިދާޅުވީ ޢުމުރުން 12 އަހަރުގެ ފިރިހެން ދަރިވަރަކާ ބެހުނުކަމުގެ ތުުހުމަތުގައި ހުޅުމާލޭ ދެވަނަ ފިޔަވަހީގައި މި މަހުގެ 23 ވަނަ ދުވަހުގެރޭ ބަޔަކު މީހަކަށް އަނިޔާކޮށްފައިވާ ދަނޑިވަޅެއްގައެވެ. އޭނާއަށް އަނިޔާކުރުމާ ގުޅިގެން ބައެއް ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ. ފުލުހުން ވެސް ވަނީ, އިންސާފު ހޯދުމަށްކަމަށް ބުނެ ޖިނާއީ މައްސަލަތަކުގައި ތުހުމަތުކުރެވޭ މީހުންނާމެދު ރާއްޖޭގެ ޤާނޫނުތަކާ ޚިލާފު އަނިޔާވެރި އަމަލުތައް ހިންގާ ފަރާތްތަކުގެ މައްސަލަ ތަޙްޤީޤުކޮށް ޤާނޫނީ ފިޔަވަޅު އަޅާނެކަމުގެ އިންޒާރު ދީފައެވެ.

އިޔާޟް ވިދާޅުވީ އެފަދަ ކަންކަމަށް މަގުފަހިކޮށްދެނީ ކަމާބެހޭ ފަރާތްތަކުން ކުށްވެރިންނަށް ޙައްޤު އަދަބު ނުދީ, ވަލު ދޮރޯށިން އެބައިމީހުން ނެރޭތީ ކަމަށެވެ. ޢާންމުން އިސްލާހުވާނީ ވެރިން އިސްލާހު ވެގެން ކަމަށް ވެސް އިޔާޟް ވިދާޅުވިއެވެ.

''ލިވާތުކުރި މީހާ އަތުގައި ބިޑި އެއް ނާޅުވާ. ނަމަވެސް މުންކަރާތް މަނާކުރިމީހާ އަތުގައި ބިޑިއެޅުވި. ‏ލިވާތުކުރި މީހުން ހައްޔަރަކު ނުބައިތިއްބާ. މުންކަރާތް މަނާކުރިމީހާ އެތައް ދުވަހަކު ގޮޅީގައި އޮންނަން ޖެހުނު. ވައްކަންކުރާ މީހުންނާއި ޑްރަގް ޑީލަރުންގެ ވާހަކަތައް ޢާންމުން ‎ފުލުހުންނަށް ރިޕޯޓުކުރި ޢަދަދު ނޭނގޭ. އެޅި ފިޔަވަޅެއްނެތް. މިހެންވީމާ މަގުމަތީ ކޯޓު އުފަންވާން މެދުވެރިވާނެ.''

އިޔާޟް ވިދާޅުވީ ‏ފަހަރެއްގައި ވެސް އެއީ ރަނގަޅު ކަމެއް ކަމަކަށް ނުދަންނަވާ ކަމަށާއި, އެއީ ރަނގަޅު ގޮތެއް ނޫން ކަމަށެވެ. ނަމަވެސް މި ފެންނަނީ އަމަންއަމާންކަން ބެލެހެއްޓުމާ ހަވާލުވެ ތިބި ފަރާތްތަކުން އެކަން ނުކުރުމުގެ ހިތި ނަތީޖާކަމަށް ވެސް އިޔާޟް ވިދާޅުވިއެވެ.