އުރީދޫގެ "ކަލަ ރަން"، ފޯރިގަދަ "ފަން ރަން" އަށް
ރާއްޖޭގައި ބާއްވާ އެންމެ ކުލަގަދަ ދުވުމުގެ މެރަތަން، "އުުރީދޫ ކަލަ ރަން" ފޯރި ގަދަ ގިނަ ހަރަކާތްތަކަކާ އެކު އަޕްގުރޭޑްކޮށް "އުރީދޫ ފަން ރަން"ގެ ގޮތުގައި އިއުލާނު ކޮށްފި އެވެ.
އެ މެރަތަން އަޕްގުރޭޑްކޮށް، ނަމަށް ގެނައި ބަދަލާ އެކު އަންނަ ޑިސެމްބަރު މަހުގެ 23 ގައި އެ ހަރަކާތް ބާއްވާނެކަން އިއުލާނު ކުރީ ސޯޝަލް މީޑިއާގައި ޕޯސްޓު ކުރި ވީޑިއޯ ޕޯސްޓަކުންނެވެ.
އެ ވީޑިއޯގައި ކުރީގެ "ކަލަ ރަން"ގެ ކުލަގަދަ ގިނަ މަންޒަރުތަކެއް ހިމަނާފައި ވާއިރު، ކުރިއަށް އޮތް ރަން ގައި ހިމަނާ ބައެއް ހަރަކާތްތަކުގެ ޓީޒާ ހިމެނެ އެވެ.
އުރީދޫގެ ސީއީއޯ ޚާލިދު އަލް ހަމަދީ ވިދާޅުވީ، އެ ކުންފުނީގެ އާ ޓެގްލައިން "އަޕްގްރޭޑް ޔޯ ވޯލްޑް" އާ އެކު އުރީދޫގެ ހުރިހާ ހިދުމަތްތަކާއި ހަރަކާތްތައް ވެސް އަޕްގްރޭޑްކޮށް، ތަރައްގީ ކުރަމުން އަންނަ ކަމަށެވެ. ކޮވިޑާ ގުޅިގެން އައި މެދުކެނޑުމަކަށް ފަހު، އުރީދޫގެ ރަން އަޕްގްރޭޑްކޮށް ބޭއްވުމަކީ އެ ހަރަކާތް އިތުރަށް ފުރިހަމަވާނެ ކަމެއް ކަމަށް އޭނާ ވިދާޅުވި އެވެ.
އަލް ހަމަދީ ވިދާޅުވީ، އެއީ ރާއްޖޭގައި ބާއްވާ އެންމެ ފޯރިގަދަ އަދި އެންމެ އުފާވެރި ދުވުމުގެ ހަރަކާތަށް ވާނެ ކަމަށެވެ. އަދި އެއީ އާއިލާ އާއި ރަހުމަތްތެރިންނާ އެކު މަޖާ ވަގުތު ކޮޅެއް ހޭދަކުރަން ލިބޭ ރަނުގެ ފުރުސަތެއްގެ ގޮތުގައި ވެސް ފާހަގަ ކުރެއްވި އެވެ.
އުރީދޫގެ "ފަން ރަން"ގެ އަމާޒަކީ ދުޅަހެޔޮ ދިރިއުޅުމަކަށް، މަޖާ މާހައުލެއްގައި ދުވުމުގެ ހަރަކާތް ޕްރޮމޯޓު ކުރުމެވެ. އަދި އެއީ އުފާވެރިކަން ގެނުވަދޭނެ ހަރަކާތެއް ކަން އަންގައިދިނުމެވެ.
އުރީދޫން ބުނީ ގިނަ ހަރަކާތްތަކެއް ހިމެނޭ "ފަން ރަން" އަކީ އަލަށް ދުވާ މީހުންނަށް ވެސް ބައިވެރިވޭނެ ކުރު ދުވުމެއް ކަމަށެވެ. އެ ރަން ގައި ދުވަން ޖެހޭނީ ފަސް ކިލޯމީޓަރަށެވެ. ވަކި ވަގުތެއްގެ ތެރޭގައި ދުވުން ނިންމާކަށް ނުޖެހެ އެވެ.
ކޮންމެ ކިލޯމީޓަރެއް ދުވެ ނިމުމުން، އެ ސަރަހައްދުގައި ބަހައްޓާފައިވާ ސްޓޭޝަންތަކުގައި، ކުލަގައިގެ އިތުރުން ފެން އަދި މަޖާ ހަރަކާތްތަކެއް ކުރިއަށް ގެންދާނެ އެވެ.
Ads by STO
