އެއާޕޯޓުގައި ޖާސޫސްކުރަން އުޅުނު މައްސަލައާ ގުޅިގެން ހުށަހެޅި ކުއްލި މައްސަލަ ބޭރުކޮށްލައިފި
ޖާސޫސް ކުރަން އުޅުނުކަމުގެ ތުހުމަތުގައި ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ހައްޔަރުކުރި ދެ މީހުންގެ ތަޙްޤީޤު ދެފުށް ފެންނަ ގޮތެއްގައި ހިންގައި, މައްސަލައިގެ ތަފްސީލު ރައްޔިތުންގެ މަޖިލީހާ ހިއްސާކުރުމަށް ގޮވައިލައްވައި, މާވަށު ދާއިރާގެ މެންބަރު މުޙައްމަދު ސަޢީދު މިއަދު ހުށަހެޅުއްވި ކުއްލި މައްސަލަ ބޭރުކޮށްލައިފިއެވެ.
އެއާޕޯޓުގައި ދޫކޮށްލާފައި އޮތް ދަބަހެއްގެތެރޭގައި އޮތް ގަމީހެއްގައި ބަޓަން ކެމެރާއެއް އޮތުމުން އެ މައްސަލައިގައި އިންޑިއާ ދެ މީހަކު ހައްޔަރުކުރީ މިދިޔަ މަހުގެ 28 ގައެވެ. އެ ދެ މީހުންނާއެކު އިތުރު ބަޔަކު ވެސް ޝާމިލްވާކަމަށް މަޢުލޫމާތު ލިބެއެވެ. ނަމަވެސް މި މައްސަލަ ފެންމަތިވުމުގެ ކުރިން އެ މީހުން ވަނީ ރާއްޖެއިން ފުރައިގެން ގޮސްފައެވެ.
ހައްޔަރުކުރި ދެ މީހުންގެ ބަންދަށް ފުރަތަމަ ވަނީ 10 ދުވަސް ޖަހައިފައެވެ. އޭގެފަހުން އެކަމާބެހޭ މަޢުލޫމާތެއް ނުލިބެއެވެ.
ރައްޔިތުން މަޖިލީހުގެ މިއަދުގެ ޖަލްސާގައި ސަޢީދު ހުށަހެޅުއްވި މައްސަލަ ބަލައިނުގަތުމަށް 34 މެންބަރުން ވޯޓު ދެއްވިއެވެ. އަދި ބަލައިގަންނަން ފެންނަކަމަށް ވޯޓު ދެއްވީ 06 މެންބަރުންނެވެ.
ސަޢީދުގެ މައްސަލައިގައި ވަނީ އެ ހާދިސާއާ ގުޅޭ ގޮތުން ފުލުހުން ނޫސްވެރިންނަށް މަޢުލޫމާތު ހިއްސާ ނުކުރާ ކަމަށާއި, އެކަމާ ގުޅުންހުރި ކަންކަން ރައްޔިތުންނަށް ސިއްރުކުރާ ކަމަށާއި, ހައްޔަރުކުރި ދެ މީހުން ވީތަނެއް ފުލުހުންނަށް ވެސް ނޭނގޭކަމާއި, އެ ހާދިސާއާ ގުޅިގެން އަދިވެސް އެއާޕޯޓުގެ ސަލާމަތީ ކަންކަން ހަރުދަނާކުރުމަށް އިތުރު ބަދަލެއް ނުގެންނަކަން ފާހަގަކުރައްވައިފައެވެ.
