އޭތިމީތިން ދެ ކުއްޖަކަށް އަނިޔާކުރިކަމަށް ބުނާ އަންހެނެއްގެ މައްޗަށް ކުށް ސާބިތެއްނުވި
ދެ ކުއްޖަކަށް އަނިޔާކުރިކަމުގެ ތުހުމަތުގައި އަންހެނެއްގެ މައްޗަށް އުފުލި ދަޢުވާ ސާބިތުނުވާކަމަށް ކްރިމިނަލް ކޯޓުން އިއްޔެ ޙުކުމްކޮށްފިއެވެ.
ދެ ކުއްޖަކަށް އަނިޔާކުރިކަމުގެ ތުހުމަތުގައި ގައިގާ އަތްލުމުގެ ކުށުގެ ދަޢުވާ އުފުލީ ހއ.ވަށަފަރު/މަލަ, އާމިނަތު ޝުޢައިބާގެ މައްޗަށެވެ.
ދަޢުވާގައި ވާ ގޮތުން 2019 ވަނަ އަހަރުގައި އެކި ދުވަސްމަތިން ޝުއައިބާ ވަނީ ދެ ކުއްޖެއްގެ ގައިގާ އަތުންނާއި، އަންނައުނު އަޅުވާ ކޮނޑުންނާއި، އަރައިގެން ހުންނަ ފައިވާނުން ޖަހައި އަނިޔާކޮށްފައެވެ.
ކްރިމިނަލް ކޯޓުގެ ވެބްސައިޓުގައި އިއްޔެ ބުނެފައިވަނީ ޝުޢައިބާގެ މައްޗަށް އުފުލި ދަޢުވާ ސާބިތުކުރުމަށް ދައުލަތުން ހުށަހެޅި ހެކި ޤަރީނާއިން, މީހަކު ކުށެއް ކޮށްފިކަން އެކަށީގެންވާ މިންވަރެއްގެ ޝައްކެއްނެތް ޝަރީޢަތަށް ސާބިތުކުރުމަށް ބޭނުންވާ މިންވަރަށް ޝަރީޢަތަށް ހެކި ޤަރީނާ ލިބިފައިނުވާތީ ދަޢުވާ ޝަރީޢަތަށް ސާބިތުނުވާކަމަށް ކަނޑައަޅައި ޙުކުމްކުރެވިފައިވާ ކަމަށެވެ.
މި މައްސަލައަކީ ކުޑަކުއްޖެއްގެ މަސްލަހަތު ހިމެނޭ މައްސަލައަކަށްވާތީ ޝަރީޢަތް ނިމުނު ގޮތުގެ ރިޕޯޓު ވެބްސައިޓަށް އަޕްލޯޑް ކުރެވިފައި ނުވެއެވެ.
