ފާޅުކަން ބޮޑުކޮށް ފުލުހުން ޤާނޫނާ ޚިލާފް ވާން ފަށައިފި: ޖަމީލް
ޤާނޫނުގައިވާ ގޮތާ ހިލާފަށް ފުލުހުން މިހާރު އަމަލުކުރަން ފަށައިފައިވާ ކަމަށް ކުރީގެ ނައިބު ރައީސް ޑރ.މުޙައްމަދު ޖަމީލް އަޙްމަދު މިއަދު ވިދާޅުވެއްޖެއެވެ.
ޖަމީލް މިފަދައިން ވިދާޅުވީ މަސްވެރިންގެ ހައްގުތައް އަޑުއިއްވުމަށް މާލޭ މަސްމާރުކޭޓު ސަރަހައްދުގައި ޕީޕީއެމުން އިސްނަގައިގެން ކުރިޔަށްގެންދިޔަ މުޒާހަރާ ތެރެއިން 10 މީހަކު ހައްޔަރުކޮށްފައިވާ ދަނޑިވަޅެއްގައެވެ.
ޖަމީލް ކުރެއްވި ޓްވީޓެއްގައި ވިދާޅުވީ ޤާނޫނުއަސާސީން ލިބިދޭ އެއްވެއުޅުމުގެ ޙައްޤަކީ މިހާރު ޖިނާއީ ކުށެއް ކަމަށް ފުލުހުން ދެކެންފަށައިފި ކަމަށެވެ. އަދި “އެޗްއާރްސީއެމުން ނިދިން ހޭލައި އަސާސީ ޙައްޤު ޗިސްޗިސް ކުރާއިރު ފިޔަވަޅެއް އަޅަން ވެއްޖެ” ކަމަށާއި ފާޅުކަންބޮޑުކޮށް ފުލުހުން ޤާނޫނާ ޚިލާފް ވާން ފަށައިފި ކަމަށްވެސް ޖަމީލް ވިދާޅުވިއެވެ.
އިދިކޮޅު އިސް ބޭފުޅުންވެސް ބައިވެރިވެވަޑައިގެން އިއްޔެ ކުރިއަށްގެންދިޔަ އެ މުޒާހަރާ ހުއްޓުވުމަށް ފުލުހުން ވަނީ ކަރުނަ ގޭސް ބޭނުންކޮށްފައެވެ. މީގެ އިތުރުން މާރުކޭޓް ކައިރީގައި އެކި ޝުއޫރުތައް ފާޅުކުރުމަށް ފަހު އެމްއެމްއޭ ދިމާލަށް މުޒާހަރާގެ ބައިވެރިން މިސްރާބު ޖެހުމުން އެ ސަރަހައްދުން އިތުރަށް ކުރިއަށް ނުދެވޭނެ ގޮތަށް ފުލުހުން އޮތީ މަގު ބަންދުކޮށްފައެވެ.
"ލޭނާރު" ގެ ނަމުގައި ބޭއްވި އެ މުޒާހަރާގެ ބައިވެރިންގެ މައިގަނޑު ކަންބޮޑުވުމަކީ މި ސަރުކާރުން މަސްވެރިންނަށްވި ވައުދުތައް ނުފުއްދާ މަސްވެރިން ބާކީކޮށްލި ކަމުގެ ޝަކުވާއެވެ.
ޕީޕީއެމުން ވިދާޅުވީ ކުރިއަށް އޮތް ތަނުގައި މިފަދަ ގިނަ މުޒާހަރާތަކެއް ފެނިގެންދާނެކަމަށާއި ވަކިން ޚާއްސަކޮށް ސަރުކާރުން ވެފައިވާ ވައުދުތަކާއި، ނުފުއްދިހުރި ވައުދުތައް ސަރުކާރަށް ހަދާން ކޮށްދިނުމަށް އެއްވުންތައް ބާއްވާނެކަމަށެެވެ.
