އޮގަސްޓް: ކުޑަކުދިންނަށް އަނިޔާކުރުމުގެ 100 މައްސަލަ
މިދިޔަ އޮގަސްޓު މަހުގައި ޖެންޑާ މިނިސްޓްރީއަށް ޖުމްލަ 248 މައްސަލަ ހުށަހެޅިއިރު އޭގެތެރެއިން 100 މައްސަލައަކީ ކުޑަކުދިންނަށް ކުރާ އެކި ބާވަތުގެ އަނިޔާއާގުޅޭ މައްސަލަކަމަށް އެ މިނިސްޓްރީން ބުނެފިއެވެ.
ޖެންޑާއިން ޢާންމުކުރި ތަފާސްހިސާބުތަކުގައިވާ ގޮތުން ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ އިހުމާލުވުމުގެ މައްސަލަތަކެވެ. އެ ގޮތުން އިހުމާލުވުމުގެ 33 މައްސަލަ ރިޕޯޓުކޮށްފައިވެއެވެ.
ދެން ހިމެނެނީ ޖިންސީ ހާނިއްކައިގެ 24 މައްސަލައާއި, ޖިސްމާނީ ހާނިއްކައިގެ 15 މައްސަލައާއި, ގެވެށި އަނިޔާގެ އަމަލެއް ކުރާތަން ކުއްޖަކަށް ދެއްކުން ނުވަތަ ފެނުމުގެ 11 މައްސަލައާއި, ނަފްސާނީ ހާނިއްކައިގެ 6 މައްސަލައާއި, އެހެން ކުދިންގެ ފަރާތުން ގަނާ ލިބުމުގެ 4 މައްސަލައާއި, ބްލެކްމެއިލް ކުރުމުގެ 2 މައްސަލައާއި, ނަހަމަ ގޮތުގައި ބޭނުންކުރުމުގެ 1 މައްސަލައާއި, އެހެން ކުދިންގެ ފަރާތުން އިންޓަނެޓް މެދުވެރިކޮށް ގަނާ ލިބުމުގެ 1 މައްސަލައާއި, އެހެނިހެން 3 މައްސަލައެވެ.
މީގެ އިތުރުން ހުށަހެޅުނު މައްސަލަތަކުގެ ތެރޭގައި ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ 41 މައްސަލައާއި, ޢާއިލީ 34 މައްސަލައާއި, އަމިއްލަ ނަފުސަށް ގެއްލުން ދިނުމާއި އަމިއްލައަށް މަރުވާން އުޅުމާގުޅޭ 12 މައްސަލައާއި, ނުކުޅެދުންތެރިކަން ހުންނަ މީހުންނާއި އުމުރުން ދުވަސްވީ މީހުންނަށް އަޅައިލުމާއި އެހީތެރިކަން ބޭނުންވެގެން ހުށަހެޅި 33 މައްސަލަ ހިމެނެއެވެ. އަދި ކުޑަކުދިންގެ އަޚުލާޤާއި ގުޅުން ހުރި 16 މައްސަލައަކާއި, ކުޑަކުދިންގެ ޙައްޤުތަކާއި ގުޅުންހުރި 4 މައްސަލައަކާއި, ކުށުގެ ވެށްޓަށް ހުށަހެޅިދާނެފަދަ އަމަލުގެ ގޮތުގައި ހުށަހެޅިފައިވާ 6 މައްސަލައާއި, ޢިޖްތިމާއީ އެހީތެރިކަން ފޯރުކޮށްދިނުމާއި ދުޅަހެޔޮކަން ކަށަވަރުކުރުމާ ގުޅުންހުރި 2 މައްސަލައެއް ހިމެނެއެވެ.
