ލޯންޗު ބަންޑުން ޖަހައިލުން: ސުވާލު އުފެދޭ ގިނަ ކަންތައްތަކެއް
އއ.މާޅޮހުގެ ދެކުނުން ލޯންޗެއް ބަންޑުން ޖަހައިލި ހާދިސާގައި ސުވާލު އުފެދޭ ކަންތައްތަކެއް އެބަހުރިކަމަށް ފުލުހުން މިއަދު ބުނެފިއެވެ.
މި މަހުގެ ފަސްވަނަ ދުވަހު މާލެއިން އުކުޅަހަށް ދަތުރު ކުރަމުންދިޔަ ލޯންޗެއްކަމަށް ބުނާ ލޯންޗު ބަންޑުން ޖަހާލައިފައި އޮއްވާ ފެނުނީ ހަތްވަނަ ދުވަހުއެވެ.
އެ ލޯންޗުގައި ތިބި ދެ މީހުން ގެއްލިގެން ހޯދަމުން ދަނިކޮށް ޢަލީ އަޙްމަދު ފެނުނީ އއ.ފެރިދޫ ފުއްޓަރާ ދިމާއިންނެވެ. ނަމަވެސް ދެން އެ ލޯންޗުގައި ހުރި މުޙައްމަދު މިންހާޖު އަދިވެސް ފެނިފައެއް ނުވެއެވެ. އޭނާ ހޯދުމުގެ އޮޕަރޭޝަން ވެސް މިހާރު ވަނީ ހުއްޓައިލާފައެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުުވުމުގައި ބުނީ އެ ހާދިސާއާ ގުޅޭ ގޮތުން މަޢުލޫމާތު ސާފުކުރަމުން އަންނަ ކަމަށެވެ. ފުލުހުން ބުނީ އެ މީހުން ނުކުމެ އުޅުނީ މަހަށް ކަމަށް ޢަލީ އަޙްމަދު ބުނެފައިވާ ކަމަށެވެ.
''އަޅުގަނޑުމެންނަށް މިހާތަނަށް ކުރެވުނު މަސައްކަތްތަކަށް ބަލާއިރުގައި ޢަލީ އަޙްމަދުގެ ފަރާތުން ލިބެމުންދިޔަ މަޢުލޫމާތާއި އަދި އަޅުގަނޑުމެންނަށް އެކިއެކި ގޮތްގޮތުން ލިބެމުންދިޔަ މަޢުލޫމާތަށް ބަލާއިރުގަ މި މީހުންގެ މި ދަތުރާބެހޭ ގޮތުން ލިބެމުންދާ މަޢުލޫމާތަކީ މުޅިން ސައްހަ މަޢުލޫމާތެއްކަމަކަށް ގަބޫލެއްނުކުރެވޭ. ނަމަވެސް އަޅުގަނޑުމެން މިދަނީ އެ ކަންކަމުގެ ޙަޤީޤަތް ހޯދުމަށް ކުރަންޖެހޭ މަސައްކަތްތައް ކުރަމުން''
ލޯންޗު ފެނުނުއިރު ވަރަށް ގިނަ ޢަދަދެއްގެ ތެޔޮ ލޯންޗުގައި ހުރިކަން ފާހަގަކޮށް ފުލުހުން ބުނީ ލޯންޗު ބަންޑުން ޖަހައިލިކަމަށް ބުނާ ހިސާބުގައި ވެސް ސުވާލު އުފެދޭ ކަންކަން އެބަހުރި ކަމަށެވެ. އަދި ލޯންޗު ބަންޑުން ޖަހާލައިފައި އޮއްވާ ފެނުނު ހިސާބާއި, ލޯންޗު ބަންޑުން ޖަހައިލިކަމަށް ޢަލީ އަޙްމަދު ބުނާ ހިސާބަށް ބަލާއިރު އެއީ މަސްވެރިކަމަށް ނުކުމެ އުޅުނު ބައެއްކަމަށް ގަބޫލެއްނުކުރެވޭކަމަށް ވެސް ފުލުހުން ބުންޏެވެ.
ފުލުހުން ބުނީ ލޯންޗުގައި ބޭނުންކޮށްފައިވާ ޖީޕީއެސްގެ ޒަރީޢާއިން އެ މީހުން ދަތުރުކުރަމުންދިޔަ ރާސްތާ ހޯދިފައިވާ ކަމަށެވެ. އަދި މި ދަތުރާ ގުޅޭ ގޮތުން އުފެދޭ ވަރަށް ބައިވަރު ސުވާލުތައް އެބަހުރި ކަމަށާއި, ތަޙްޤީޤުގެ ތެރެއިން އެ ސުވާލުތަކަށް ޖަވާބު ހޯދުމުގެ މަސައްކަތް ކުރަމުން އަންނަކަމަށް ވެސް ފުލުހުން ވަނީ ބުނެފައެވެ.
